ព័ត៌មានជាតិ

ចំណតស្ថានីយថ្មីព្រលានយន្តហោះខេត្តព្រះសីហនុ គ្រោងបញ្ចប់ការសាងសង់នៅឆ្នាំ ២០២៦

បានផុស

១ year មុន

នៅ

ថ្ងៃសុក្រ ២ កុម្ភៈ ២០២៤

ដោយ

ចំណតស្ថានីយថ្មីនៅព្រលានយន្តហោះខេត្តព្រះសីហនុ គ្រោងបញ្ចប់ការសាងសង់នៅឆ្នាំ ២០២៦។ នេះបើតាមការបញ្ជាក់ពីនាយកក្រុមហ៊ុន Vinci Airports នៅចំពោះមុខលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា ខណៈលោកចូលជួបពិភាក្សាការងារអំពីការវិនិយោគនៅប្រទេសកម្ពុជា។

លោក Emmanuel MENANTEAU ប្រធានប្រចាំតំបន់នៃក្រុមហ៊ុន VINCI Airports បានគូសបញ្ជាក់ថា ជំនួបនាឱកាសនោះក្នុងគោលបំណងដើម្បីគោរពស្នើសុំអនុសាសន៍ណែនាំពីលោកឧបនាយករដ្ឋមន្ត្រី ស៊ុន ចាន់ថុលទាក់ទងនឹងគម្រោងវិនិយោគអាកាសយានដ្ឋាននៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានប្រចាំតំបន់នៃក្រុមហ៊ុន VINCI Airports រូបនេះក៏បានលើកអំពីគម្រោងពង្រីកអាកាសយានដ្ឋានអន្តរជាតិខេត្តព្រះសីហនុជាមួយការបង្កើតចំណតស្ថានីយថ្មី (New Terminal) ដែលតាមផែនការគ្រោងបញ្ចប់ការសាងសង់នាឆ្នាំ២០២៦។

ក្រុមហ៊ុន VINCI Airports មានបទពិសោធន៍ប្រមាណ ២៥ ឆ្នាំនៅកម្ពុជា លើការវិនិយោគក្នុងគម្រោងអាកាសយានដ្ឋានដោយក្នុងនោះមានអាកាសយានដ្ឋានចំនួន ៣ នៅក្នុងប្រទេសកម្ពុជាដែលក្រុមហ៊ុនធ្លាប់បាននិងកំពុងប្រតិបត្តិការរួមមានអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប និងអាកាសយានដ្ឋានអន្តរជាតិខេត្តព្រះសីហនុ។

មានមូលដ្ឋាននៅប្រទេសបារាំងក្រុមហ៊ុនជាបុត្រសម្ព័ន្ធរបស់ VINCI Group ដែលជាក្រុមហ៊ុនឈានមុខលើការវិនិយោគគម្រោងសម្បទាននានាគ្របដណ្ដប់លើសេវាកម្មដូចជា៖ VINCI Airports, VINCI Highways, VINCI Railways, VINCI Construction, VINCI Transport Infrastructure និង VINCI Energy៕