ព័ត៌មានជាតិ

ប្រជាពលរដ្ឋក្រីក្រជាង ៥០០ គ្រួសារ ទទួលបានអំណោយពីធនាគារ សាខមប៊ែង ខេមបូឌា

បានផុស

៨ ខែ មុន

នៅ

ថ្ងៃសុក្រ ២ កុម្ភៈ ២០២៤

ដោយ

បាត់ដំបង ៖ នៅព្រឹកថ្ងៃទី ២ ខែកុម្ភៈ ឆ្នាំ២០២៤ នេះ នៅក្នុងបរិវេណវិមានសព ស្ថិតក្នុងភូមិ ១៣ មករា សង្កាត់ព្រែកព្រះស្ដេច ក្រុងបាត់ដំបង មានរៀបចំពិធីចែកអំណោយជាគ្រឿងឧបភោគ បរិភោគ ដល់ប្រជាពលរដ្ឋក្រីក្រដែលជួបផលលំបាកនៅក្នុងគ្រួសារមកពីតាមបណ្ដាក្រុង ស្រុក មួយចំនួន ក្នុងខេត្តបាត់ដំបងសរុបជាង ៥០០ គ្រួសារ ដែលជាអំណោយរបស់ធនាគារសាខមប៊ែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងពិធីនេះដែរក៏មានការអញ្ជើញចូលរួមពីសំណាក់លោក សឿម ប៊ុនរិទ្ធ អភិបាលរងនៃគណៈអភិបាលខេត្តបាត់ដំបង លោក លាង វាសនា អភិបាលក្រុងបាត់ដំបង លោក Nguyen Thanh Van អគ្គកុងស៊ុលនៃសាធារណរដ្ឋសង្គមនិយមវៀតណាមប្រចាំខេត្តបាត់ដំបង លោក Trinh Van Ty ប្រធានក្រុមប្រឹក្សាភិបាល នៃធនាគារសាខមប៊ែង ខេមបូឌា លោក Phung Thai Phung សមាជិកក្រុមប្រឹក្សាភិបាល និងជាអគ្គនាយកនៃធនាគារ សាខមប៊ែង និងសមាជិកធនាគារ រួមទាំងកងកម្លាំងប្រដាប់អាវុធនិងប្រជាពលរដ្ឋយ៉ាងច្រើនកុះករ។

ជាកិច្ចចាប់ផ្ដើមលោក Phung Thai Phung បានធ្វើការសំណេះសំណាលនិងថ្លែងទៅកាន់អង្គពិធីថា នេះជាលើកទី ២១ ហើយ ដែលធនាគារបានរៀបចំជាអំណោយ ដើម្បីធ្វើការចែកជូនដល់ប្រជាពលរដ្ឋក្រីក្រនៅក្នុងខេត្ត បាត់ដំបងក៏ដូចជាខេត្តផ្សេងៗទៀតនៅក្នុងប្រទេសកម្ពុជា ដោយបានធ្វើជារៀងរាល់ឆ្នាំ បើទោះបីជាអំណោយមានភាពតិចតួចក្តី ក៏វាជាទឹកចិត្តដ៏ថ្លៃថ្លាក្នុងការចូលរួមចំណែកជួយដល់ពលរដ្ឋដែលមានជីវភាពខ្វះខាត ហើយក៏ជាកាយវិការមួយប្រកបដោយភាពកក់ក្តៅ នៅក្នុងថ្ងៃបុណ្យចូលឆ្នាំនាពេលខាងមុខនេះ ដូចពាក្យស្លោកបានលើកឡើងថា ” អភិវឌ្ឍន៍ឆ្ពោះទៅមុខទាំងអស់គ្នា “។

បន្ទាប់ពីលោក Nguyen Thanh Van អគ្គកុងស៊ុលវៀតណាមប្រចាំខេត្តបាត់ដំបង បានអញ្ជើញឡើងថ្លែងអំណរគុណ ដល់ប្រជាពលរដ្ឋដោយធ្វើយ៉ាងណាត្រូវចេះរឹតចំណងសាមគ្គីភាពរវាងប្រទេសទាំងពីរឲ្យបានយូរអង្វែងរួចមក លោក សឿម ប៊ុនរិទ្ធ អភិបាលរងនៃគណៈអភិបាលខេត្ត និងជាតំណាងឲ្យលោក សុខ លូ អភិបាលនៃគណៈអភិបាលខេត្ត បានអញ្ជើញឡើងមានចំណាប់អារម្មណ៍ និងថ្លែងអំណរគុណយ៉ាងជ្រាលជ្រៅដល់ធនាគារសាខមប៊ែង ដែលបានគិតគូរអំពីសុខទុក្ខរបស់ប្រជាពលរដ្ឋ និងតែងតែរៀបចំកម្មវិធីនេះឡើងជារៀងរាល់ឆ្នាំ ដើម្បីជួយសម្រាលដល់ជីវភាពរស់នៅប្រចាំថ្ងៃ ដែលនេះជាកាយវិការមួយដ៏ល្អប្រពៃនិងក្នុងគោលបំណងរឹតចំណងសាមគ្គីភាព រវាងប្រទេសទាំងពីរកម្ពុជា វៀតណាម ដែលជាប្រទេសភូមិផងរបងជាមួយនិងមានព្រំដែនជាប់គ្នា ដែលអាចបង្កភាពងាយស្រួលដល់បងប្អូនប្រជាពលរដ្ឋទាំងពីរប្រទេសដែលនៅជិតព្រំដែនក្នុងការប្រកបមុខរបរទទួលទាន និងផ្លាស់ប្ដូរមុខទំនិញគ្នាទៅវិញទៅមក។

លោកអភិបាលរងខេត្តបានបន្តថា ក្នុងនាមអាជ្ញាធរខេត្តទាំងពេលបច្ចុប្បន្នក៏ដូចជាពេលទៅអនាគត គឺចង់ឃើញប្រជាពលរដ្ឋ រស់នៅប្រកបដោយភាពសុខសាន្តនិងចេះបង្កើតចំណងសាមគ្គីគ្នារវាងប្រទេសទាំងពីរ កម្ពុជា វៀតណាម ឲ្យកាន់តែស្អិតរមួត ចេះជួយគ្នាទៅវិញទៅមក មិនរើសអើង និងមានភាពយូរអង្វែងមិនសាបសូន្យ។

នៅចុងបញ្ចប់នៃកម្មវិធីគណៈអធិបតីទាំងអស់ បានអញ្ជើញនាំយកអំណោយដែលក្នុងនោះមានជាគ្រឿង ឧបភោគ បរិភោគ និងថវិកាមួយចំនួន ទៅចែកជូនដល់បងប្អូនប្រជាពលរដ្ឋដែលកំពុងជួបការលំបាកទាំងជាង ៥០០ គ្រួសារ ដោយម្នាក់ៗមានទឹកមុខប្រកបដោយភាពរីករាយ និងត្រេកអរក្រៃលែង៕

អត្ថបទ ៖ សោ និយមរ័ត្ន