ពលរដ្ឋថាមានការនាំចូលសាច់បង្កកខុសច្បាប់រាប់តោន ពីវៀតណាមចូលមកកម្ពុជាតាមច្រកត្រពាំងផ្លុង​

ប្រជាពលរដ្ឋដែលរស់នៅក្នុងស្រុកពញាក្រែក ខេត្តត្បូងឃ្មុំ បានទម្លាយប្រាប់ «កម្ពុជាថ្មី» ថា មានការនាំចូលបង្គារ បង្កង ត្រី និងសាច់បង្កក ពីប្រទេសវៀតណាម ចូលមកប្រទេសកម្ពុជារៀងរាល់យប់ តាមច្រករបៀង ស្លាបឆ្វេង ស្លាបស្ដាំ ក្នុងឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ។

 បើតាមប្រភពដែលរស់នៅឃុំត្រពាំងផ្លុង ស្រុកពញាក្រែក ផ្ទាល់ បានឲ្យដឹងថា ក្នុងមួយយប់ៗ មានឈ្មួញលួចនាំចូលនូវសាច់បង្កក បង្គារ បង្កង និងត្រីគេចពន្ធ ពីប្រទេសវៀតណាមចូលមកកម្ពុជាតាមច្រករបៀងចំណុចស្លាបទាំងសងខាងនៃច្រកត្រពាំងផ្លុង (ចម្ងាយពីច្រកទ្វាព្រុំដែនអន្តរជាតិត្រពាំងផ្លុងប្រហែលជា ៣ គីឡូម៉ែត្រ ដែលលួចនាំចូលតាមច្រកចាំហាយ និងច្រកស្ពានតាចក់) ខណៈដែលសមត្ថកិច្ចពាក់ព័ន្ធនៅគោលដៅនោះ មិនបានចាត់វិធានការឡើយ។

អ្នកស្រុកទម្លាយឱ្យដឹងទៀត បង្គារ បង្កង ត្រី និងសាច់បង្កក នាំចូលមកពីប្រទេសវៀតណាមនេះ គ្មានការត្រួតពិនិត្យពីគុណភាពសោះឡើយ។ ការណ៍នេះ គឺបណ្ដាលឱ្យពលរដ្ឋមានការព្រួយបារម្ភពីផងប៉ះពាល់ដល់សុខភាពកូនចៅក្នុងស្រុកយ៉ាងធ្ងន់ធ្ងរ។

  ទាក់ទងនឹងបញ្ហានេះ «កម្ពុជាថ្មី» បានព្យាយាមទាក់ទងទៅ ប្រធានច្រកទ្វាអន្តរជាតិត្រពាំងផ្លុង លោក មួន សុភាព តាមប្រព័ន្ធទូរស័ព្ទ ជាច្រើនលើក ប៉ុន្តែគ្មានការឆ្លើយតបឡើយ៕

អត្ថបទដោយ៖ សាន វិឡែម