៦ ខេត្ត​​​បន្សល់​មីនច្រើនជាងគេ ខណៈឆ្នាំ​២០២៤ គ្រោងរំដោះដី​​ចម្ការ​មីន​ឲ្យ​បាន​ ២៧០ គីឡូម៉ែត្រក្រឡា

លោក ហេង រតនា ប្រតិភូរាជរដ្ឋាភិបាលកម្ពុជាទទួលបន្ឌុកជាអគ្គនាយកស៊ីម៉ាក់បានឱ្យដឹងថា សម្រាប់ឆ្នាំ២០២៤នេះ អង្គភាពស៊ីម៉ាក់មានផែនការបោសសម្អាតផ្ទៃដីចម្ការមីន/គ្រាប់ប្រមាណជាង ២៧៤ គីឡូម៉ែត្រក្រឡា ក្នុងនោះផ្ទៃដីចម្ការ​មីន​ចំនួន ១៩៩ គីឡូម៉ែត្រក្រឡា និងផ្ទៃដីចម្ការគ្រាប់ចំនួន ៧៥ គីឡូម៉ែត្រក្រឡា ព្រមទាំងផ្ដល់ការអប់រំយល់ដឹងពីមីនដល់​ប្រជាពលរដ្ឋមូលដ្ឋានប្រមាណចន្លោះពី ១,៨ លាននាក់ទៅ ២ លាននាក់ និងរៀបចំផែនការស្រាវជ្រាវព័ត៌មានចម្ការមីន/គ្រាប់ផងដែរ។

ថ្លែងនៅក្នុងកិច្ចប្រជុំសាមញ្ញក្រុមប្រឹក្សាភិបាល នៃមជ្ឈមណ្ឌលសកម្មភាពកំចាត់មីនកម្ពុជាកាលពីរសៀលថ្ងៃទី ១ កុម្ភៈ លោកអគ្គនាយកបានបន្តថា ឆ្នាំ២០២៣ កន្លងទៅនេះស៊ីម៉ាក់បានរំដោះផ្ទៃដីចម្ការមីន/គ្រាប់បានចំនួន ២.៦០២ ទីតាំង មានផ្ទៃដីសរុបចំនួនជាង ២៨១ លានម៉ែត្រក្រឡា។ កិច្ចប្រតិបត្តិការនេះបានរុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន ៨៣ ៨១៤ គ្រាប់ មានប្រជាពលរដ្ឋទទួលផលដោយផ្ទាល់ និងដោយប្រយោលមានចំនួន ៥៤៥ ៣៧៨ គ្រួសារ។

ឆ្នាំ២០២៣ កន្លងទៅនេះ ស៊ីម៉ាក់ក៏បានចុះធ្វើការផ្សព្វផ្សាយអប់រំការយល់ដឹងពីមីន/គ្រាប់ដល់ក្រុមគោលដៅបានចំនួន ១៨ ៣៤៩ លើក ស្មើនឹង ៨៧៩ ០៤៤ ខ្នងផ្ទះ មានប្រជាពលរដ្ឋចូលរួមសរុបចំនួន ១,៣លាននាក់ផងដែរ។

យ៉ាងណាក៏ដោយសម្រាប់ឆ្នាំ២០២៤ នេះស៊ីម៉ាក់បានដាក់គោលដៅប្រឹងប្រែង​បោស​សម្អាត​មីន​ក្នុងខេត្តចំនួន ៨ ដែលក្នុងនោះរួមទាំង​ខេត្ត​ជាប់​បន្ទាត់​ព្រំដែន​ឱ្យសម្រេចតាមផែនការរាជរដ្ឋាភិបាលកម្ពុជាអស់មីនក្នុងឆ្នាំ ២០២៥ ឲ្យទទួល​បាន​ជោគ​ជ័យ​។

នាយឧត្តម សេនីយ៍ ខឹម សោភ័ណ ប្រធាន​ក្រុម​ប្រឹក្សា​ភិបាល​ផ្ទេរសិ​ទ្ធ​នៃ​មជ្ឈមណ្ឌល​សកម្មភាព​កំចាត់​មីនកម្ពុជាបានឱ្យដឹងថា ខេត្ត​ដែល​នៅ​មាន​មីន និងគ្រាប់មិនទាន់ផ្ទុះដែលប្រឈមគ្រោះថ្នាក់នៅឡើយនោះ មានដូចជាខេត្តពោធិ៍សាត់ ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តឧត្តរមានជ័យ និងខេត្តព្រះវិហារជាដើម។ ប៉ុន្តែ​ខេត្តដែលនៅ​សល់​មីនច្រើនជាងគេដែលត្រូវខិតខំនិង​ពន្លឿនធ្វើការដោះនិងកម្ទេចឲ្យអស់ គឺ​ខេត្តពោធិ៍សាត់ បាត់ដំបង និងបន្ទាយមានជ័យ៕

អត្ថបទ៖សំអឿន