ពេញ១ឆ្នាំ២០២៣ សំណូមពរពលរដ្ឋ៤៦៧ដែលផ្ញើ​ចូល​ហ្វេសប៊ុកលោក ស សុខា ត្រូវបានដោះស្រាយ

លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានឱ្យដឹងថា ក្នុងរយៈពេលពេញ១ឆ្នាំ២០២៣ កន្លងទៅនិងសេសសល់ពីឆ្នាំមុនៗខ្លះ គឺមតិយោបល់ ឬសំណូមពររបស់ពលរដ្ឋដែលផ្ញើមកទំព័រហ្វេសប៊ុករបស់លោក និងទំព័រហ្វេសប៊ុកសម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រចំនួន៤៦៧គណនី ត្រូវបានសមត្ថកិច្ចក្រសួងមហាផ្ទៃ ដោះស្រាយ។ លោកបានបង្ហាញឱ្យដឹងបែបនេះ នៅលើទំព័រហ្វេសប៊ុករបស់លោកនៅរសៀលថ្ងៃចន្ទនេះ។

លោក ស សុខា បានសង្កត់ធ្ងន់ថា លោកទទួលបានសំណូមពរ សំណួរ និងមតិយោបល់របស់ពលរដ្ឋតាមរយៈទំព័រហ្វេសប៊ុករបស់លោក និងសម្តេចក្រឡាហោម ស ខេង ក្នុងសមត្ថកិច្ចរបស់ក្រសួងមហាផ្ទៃបានចំនួន ១ ០៤៧គណនី។ ក្នុងនោះ ក្រុមការងាររបស់លោកបានដោះស្រាយ និងបានឆ្លើយតបទៅម្ចាស់គណនីបានចំនួន ៤៦៧គណនី និងករណី ចំនួន ៤១៩គណនីទៀត កំពុងស្ថិតក្នុងដំណាក់កាលដោះស្រាយ។ ដោយឡែក ករណីមិនទាន់ដោះស្រាយតាំងពីឆ្នាំ២០២០ ដល់ឆ្នាំ២០២៣កន្លងទៅដែលមានចំនួន ៤១៩គណនី គឺក្រុមការងាររបស់លោកបាន និងកំពុងបន្តដំណើរការដោះស្រាយជូនផងដែរ។ យ៉ាងណាក៏ដោយ លោក ស សុខា ក៏សុំការយល់យោគអធ្យាស្រ័យពីពលរដ្ឋចំពោះករណីមួយចំនួនទៀត ដែលក្រុមការងារ និងភាគីពាក់ព័ន្ធ នៅមិនទាន់បានដោះស្រាយចប់សព្វគ្រប់ ដោយសារតែករណីខ្លះមានភាពស្មុគស្មាញត្រូវទាមទារពេលវេលាក្នុងការដោះស្រាយ។

ដោយឡែក សម្រាប់អ្នកដែលបានផ្ញើសារផ្សេងៗទៅកាន់ហ្វេសប៊ុករបស់លោក និងសម្តេច ស ខេង ដែលមិនស្ថិតក្នុងដែនសមត្ថកិច្ចរបស់ក្រសួងមហាផ្ទៃនោះ លោក ស សុខា ក៏បានរុញសំណូមពរ សំណួរ និងមតិយោបល់ទាំងនោះទៅកាន់ស្ថាប័នពាក់ព័ន្ធផ្សេងទៀត ដើម្បីដោះស្រាយ។ លោកឧបនាយករដ្ឋមន្រ្តី ក៏បានបន្តទៀតថា ការផ្ញើសារ បញ្ចេញ​មតិយោបល់ ក៏ដូចជាសំណួរ និងសំណូមពររបស់ពលរដ្ឋទៅកាន់ទំព័រហ្វេសប៊ុករបស់លោក និងសម្តេច ស ខេង នេះ គឺជាផ្នែកមួយដ៏សំខាន់ក្នុងការជួយសម្រួលជីវភាពរស់នៅរបស់ពលរដ្ឋ និងរួមគ្នាអភិវឌ្ឍន៍សង្គមជាតិកាន់តែរីកចម្រើនថែមទៀត៕