ព្រះសង្ឃ​និង​ពលរដ្ឋ​ថៃ រង់ចាំស្វាគមន៍​សម្តេច​ធិបតីហ៊ុន ម៉ាណែត ក្រោយ​ទទួល​ដំណឹង​ពី​ដំណើរ​ទស្សនកិច្ច

សម្តេច​មហា​បវរ​ធិបតី ហ៊ុន ម៉ា​ណែ​ត នាយករដ្ឋមន្ត្រី​នៃ​កម្ពុជា នឹង​ធ្វើដំណើរ​ទៅកាន់​ប្រទេស​ថៃ​នៅ​សប្តាហ៍​នេះ ព្រះសង្ឃ និង​ពលរដ្ឋ​ថៃ​ជាច្រើន បាន​សម្តែង​ក្តី​រីករាយ និង​គាំទ្រ​ចំពោះ​ដំណើរ​ទស្សនកិច្ច​ជា​ផ្លូវការ​នេះ​។

ព្រះមហា សុវណ្ណ ព្រះសង្ឃ​ខ្មែរ​គង់នៅ​ក្រុង​បាងកក ប្រទេស​ថៃ បាន​មាន​សង្ឃដីការ​សម្តែង​ការស្វាគមន៍​ដំណើរ​ទស្សនកិច្ច​របស់ សម្តេច​មហា​បវរ​ធិបតី ហ៊ុន ម៉ា​ណែ​ត នាយករដ្ឋមន្ត្រី​នៃ​កម្ពុជា ដែល​ដឹកនាំ​ប្រតិភូ​កម្ពុជា​អញ្ជើញ​ទៅ​បំពេញ​ទស្សនកិច្ច​ផ្លូវការ​នៅ​ទីក្រុង​បាងកក ប្រទេស​ថៃ​។ ព្រះ​តេជគុណ​បាន​ប្រគេន​ពរ​ដល់​សម្តេចនាយក​រដ្ឋមន្ត្រី​ឱ្យសម្រេចបាន​នៅ​ក្តី​បំណង​ទាំងឡាយ ពិសេស​លើ​ការកសាង​សន្តិភាព​នៅ​កម្ពុជា ជា​និរន្តរ​ត​រៀង​ទៅ​។

​ព្រះ​តេជគុណ​ក៏បាន​ប្រគេន​ក្តី​នឹករលឹក​ដល់​ប្រជាពលរដ្ឋ​ខ្មែរ តាមរយៈ​សម្តេចនាយក​រដ្ឋមន្ត្រី បន្ទាប់ពី​ព្រះអង្គ​បានមក​រស់នៅ​ដឹក​ដី​ថៃ​ប្រមាណ​៥០​ឆ្នាំ​មកនេះ​។

លោកស្រី ម៉ា​រី តា​យ៉ូ ជា​ប្រជាពលរដ្ឋ​ថៃ​រស់នៅ​ទីក្រុង​បាងកក ក៏បាន​សម្តែង​ការស្វាគមន៍​ចំពោះ​ដំណើរ​ទស្សនកិច្ច​របស់ សម្តេច​មហា​បវរ​ធិបតី ហ៊ុន ម៉ា​ណែ​ត និង​គណៈប្រតិភូ​អមដំណើរ​ដោយ​ក្តី​រីករាយ​ផងដែរ​។

គួរ​បញ្ជាក់​ថា សម្តេច​មហា​បវរ​ធិបតី ហ៊ុន ម៉ា​ណែ​ត នាយករដ្ឋមន្ត្រី​នៃ​កម្ពុជា នឹង​អញ្ជើញ​ទៅ​បំពេញ​ទស្សនកិច្ច​ផ្លូវការ​នៅ​ប្រទេស​ថៃ នៅ​ថ្ងៃទី​០៧ ខែកុម្ភៈ ឆ្នាំ​២០២៤ តប តាម​ការអញ្ជើញ​របស់ លោក សេដ្ឋា ថា​វី​ស៊ីន នាយករដ្ឋមន្ត្រី​នៃ​ព្រះរាជាណាចក្រ​ថៃ។

សម្តេច​ធិបតី ហ៊ុន ម៉ា​ណែ​ត និង​លោក សេដ្ឋា ថា​វី​ស៊ីន នឹង​ជួបពិភាក្សា​ការងារ​លើ​កិច្ចសហប្រតិបត្តិការ​ទ្វេភាគី និង​ពហុភាគី ដែល​ផ្តល់​ផលប្រយោជន៍​ទៅវិញទៅមក​។

​ទន្ទឹម​នឹង​នេះ នាយករដ្ឋមន្ត្រី​ទាំងពីរ ក៏​នឹង​ធ្វើជា​អធិបតី​ក្នុង​ពិធី​ចុះហត្ថលេខា​លើ​ឯកសារ​ស្តីពី​កិច្ចសហប្រតិបត្តិការ ទ្វេភាគី​មួយចំនួន​។ បន្ថែម​ពីនេះ សម្តេច​ធិបតី ហ៊ុន ម៉ា​ណែ​ត ក៏​នឹង​អញ្ជើញ​ថ្លែង​សុន្ទរកថា​បើក​នៅក្នុង វេទិកា​ធុរកិច្ច​កម្ពុជា​-​ថៃ​ផងដែរ​៕