អាជ្ញាធរខេត្តសៀមរាប ជំរុញឱ្យបង្កើនការផ្សាយពីសក្តានុពលទេសចរណ៍ ដើម្បីទាក់ទាញភ្ញៀវបន្ថែម

 ក្នុងពិធីជូនលិខិតសរសើរដល់អ្នកចូលរួមក្នុង ព្រឹត្តិការណ៍ “ដំណើរកំសាន្តក្នុងមហានគរ  និងបរិច្ចាគឈាម  កាលពីរាត្រីថ្ងៃទី០៤ ខែកុម្ភៈ ឆ្នាំ២០២៤នេះ លោក យុន លីនណេ អភិបាលរងខេត្តសៀមរាប បានវាយតម្លៃខ្ពស់ ចំពោះកិច្ចសហការរៀបចំព្រឹត្តិការណ៍នេះឡើង ដែលជាការងាររួមគ្នាដើម្បីសង្គម ពិសេសជាការផ្សព្វផ្សាយពីតំបន់រមណីយដ្ឋានសហគមន៍ទេសចរណ៍សំខាន់ៗ ក្នុងខេត្តសៀមរាប។

ជាមួយគ្នានេះ អភិបាលរងខេត្តសៀមរាប បានសង្ឃឹមថា សកម្មភាពនេះនឹងបន្តកើតមានជារៀងរាល់ឆ្នាំ ស្របពេលដែលឆាប់ៗខាងមុខខេត្តសៀមរាប នឹងមានវីដេអូល្អៗជាច្រើន ដើម្បីផ្សព្វផ្សាយឱ្យកាន់តែទូលំទូលាយ សំដៅទាក់ទាញ និងនាំយកភ្ញៀវទេសចរណ៍មកលេងខេត្តទេសចរណ៍ប្រវត្តិសាស្ត្រនេះកាន់តែច្រើនឡើង ក៏ដូចជាវិនិយោគិននានា តាមរយៈការចូលរួមរបស់សិល្បករ សិល្បការនីគ្រប់ផ្នែក ក្នុងខេត្តសៀមរាបផ្ទាល់។

គួររំលឹកថា ក្រោមកិច្ចសហការរួមគ្នា រវាងសមាគមទេសចរណ៍មូលនិធិឈាម នី  មុនីនាថ សមាគមសហគ្រិនវ័យក្មេងកម្ពុជា មន្ទីរទេសចរណ៍ខេត្ត រដ្ឋបាលខេត្ត សហភាពសហព័ន្ធយុវជនកម្ពុជាខេត្ត និងមជ្ឈមណ្ឌលជាតិផ្តល់ឈាម បានផ្តួចផ្តើមបង្កើតព្រឹត្តិការណ៍ ដំណើរកំសាន្តក្នុងមហានគរ  និងបរិច្ចាគឈាម ក្នុងរយៈពេលពីរថ្ងៃ គឺនៅថ្ងៃទី០៣និងថ្ងៃទី០៤ ខែកម្ភៈឆ្នាំ២០២៤ ក្នុងគោលបំណង ចូលរួមចំណែកពង្រឹងសុខមាលភាពសង្គម និងបម្រើប្រយោជន៍សាធារណៈ ចែករំលែកក្តីស្រឡាញ់ និងការជួយដល់អាយុជីវិតមនុស្ស។

យុទ្ធនាការនេះ ក៏ជាចលករមួយចូលរួមចំណែកជាមួយរាជរដ្ឋាភិបាល ដែលបានដាក់ចេញនូវកម្មវិធីពិសេសមួយ គឺទស្សនាសៀមរាបឆ្នាំ២០២៤ សំដៅជំរុញឱ្យវិស័យទេសចរណ៍នៅក្នុងខេត្តសៀមរាបមានសន្ទុះងើបឡើងវិញ តាមរយៈការចូលរួមផ្សព្វផ្សាយឱ្យបានទូលំទូលាយពីគ្រប់ភាគី ជាពិសេសតារាសម្តែងគ្រប់ទម្រង់ រួមទាំង Vlogger ជាច្រើនរូប។

ក្នុងកម្មវិធីយុទ្ឋនាការដំណើរកំសាន្តក្នុងមហានគរនៅខេត្តសៀមរាបនេះ មានតារាសម្តែងគ្រប់ទម្រង់ប្រមាណជាង១០០នាក់ បានចែកជា៧ក្រុម ដើម្បីធ្វើដំណើរទៅកម្សាន្តនៅតាមគោលដៅជាក់ស្តែង ដូចជា ៖ នៅតំបន់ប្រាសាទចំនួន១៤  តំបន់រមណីយដ្ឋាន និង សហគមន៍ទេសចរណ៍ ១៥ ទីតាំង អាហារដ្ឋានចំនួន៧កន្លែង ក្នុងចំណោម៥ស្រុក-ក្រុង៕

អត្ថបទ៖ គឿនវេត