ព័ត៌មានជាតិ

ក្រសួងការងារ រៀបចំជំនួបរវាង សម្ដេចតេជោ និង សម្ដេចធិបតី ជាមួយកម្មករ ១,៥ លាននាក់ នៅឆ្នាំ ២០២៣ និងដើមឆ្នាំ ២០២៤

បានផុស

១០ ខែ មុន

នៅ

ថ្ងៃពុធ ៧ កុម្ភៈ ២០២៤

ដោយ

ថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ ២០២៣ និងលើកទិសដៅការងារឆ្នាំ ២០២៤ របស់ក្រសួងការងារ និងបណ្ដុះបណ្ដាលវិជ្ជាជីវៈ និងប្រកាសដាក់ឱ្យអនុវត្ត«ផែនការយុទ្ធសាស្ត្រអភិវឌ្ឍន៍វិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ» នៅថ្ងៃទី ៧ ខែកុម្ភៈ ឆ្នាំ ២០២៤ នេះ លោកស្រី សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារ និងបណ្ដុះបណ្ដាលវិជ្ជាជីវៈ បានបញ្ជាក់ថា នៅឆ្នាំ ២០២៣ ក្រសួងការងារ និងបណ្ដុះបណ្ដាលវិជ្ជាជីវៈ បានសហការជាមួយក្រសួង ស្ថាប័នពាក់ព័ន្ធ ក្នុងការរៀបចំកម្មវិធីសំណេះសំណាលរបស់ សម្ដេចតេជោ ជាមួយកម្មករ-និយោជិត ទាំងក្នុង និងក្រៅប្រព័ន្ធ សរុបទាំង ២ ជុំ ចំនួន ៩៦ លើក ដែលមានកម្មករ-និយោជិត សរុបប្រមាណជាង ១,៣ លាននាក់ និងបានចូលរួមអនុវត្តដោយជោគជ័យនូវអនុសាសន៍គន្លឹះទាំង ១០ ចំណុច របស់ សម្ដេចតេជោ និងអនុសាសន៍ថ្មីៗ បន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី សុវណ្ណ វណ្ណារតន៍ មានប្រសាសន៍បន្ថែមថា ជាមួយនោះ ក្រសួងការងារ ក៏បានសហការរៀបចំកម្មវិធីសំណេះសំណាលរបស់ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាមួយកម្មករ-និយោជិត តាមរោងចក្រ សហគ្រាស ចាប់ពីថ្ងៃទី ២៩ ខែសីហា ឆ្នាំ ២០២៣ ដល់ ថ្ងៃទី ៨ ខែមករា ឆ្នាំ ២០២៤ បានចំនួន ១១ លើក មានកម្មករ-និយោជិត ប្រមាណជាង ១៨ ម៉ឺននាក់។

គួរជម្រាបថា តាមរយៈកម្មវិធីសំណេះសំណាលនេះ សម្ដេចធិបតី បានផ្ដល់អនុសាសន៍ ៦ ចំណុច សម្រាប់ក្រសួងអនុវត្តភ្លាមនៅឆ្នាំ ២០២៣ និងអនុសាសន៍ ៤ ចំណុច បន្ថែមទៀត សម្រាប់អនុវត្តនៅ ២ ឆ្នាំបន្ទាប់ ដែលផ្ដោតសំខាន់ក្នុងការអភិវឌ្ឍទីផ្សារការងារ និងការអភិវឌ្ឍមូលធនមនុស្ស ស្របតាមយុទ្ធសាស្ត្របញ្ចកោណ ដំណាក់កាលទី ១ ដើម្បីកំណើនការងារ សមធម៌ ប្រសិទ្ធភាព និងចីរភាព៕