សម្ដេច ហ៊ុន ម៉ាណែត ពិភាក្សាជាមួយនាយករដ្ឋមន្ត្រីថៃ អំពីការមិនយកថ្លៃប័ណ្ណចេញ-ចូលព្រំដែន អំឡុងពេលចូលឆ្នាំថ្មី

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានឲ្យដឹងថា សម្ដេច បានជជែកពិភាក្សាជាមួយនាយករដ្ឋមន្ត្រីថៃ លោក សេដ្ឋា ថាវីស៊ីន អំពីការមិនយកថ្លៃប័ណ្ណចេញ-ចូលព្រំដែន ប្រទេសទាំងពីរ អំឡុងពេលបុណ្យចូលឆ្នាំថ្មី នាខែមេសាខាងមុខ។ ការឲ្យដឹងនេះ ធ្វើឡើងក្នុងពិធីបិទសន្និបាតរបស់ក្រសួងការងារ និងបណ្ដុះបណ្ដាលវិជ្ជាជីវៈ នាល្ងាចថ្ងៃទី ៨ ខែកុម្ភៈ ឆ្នាំ ២០២៤នេះ។

សម្ដេចធិបតី ហ៊ុន ម៉ាណែត មានប្រសាសន៍ថា នៅក្នុងដំណើរទស្សនកិច្ចនៅប្រទេសថៃ កាលពីថ្ងៃទី ៧ ខែកុម្ភៈកន្លងទៅនេះ សម្ដេច បានជជែកពិភាក្សាជាមួយនាយករដ្ឋមន្ត្រីថៃ លោក សេដ្ឋា ថាវីស៊ីន អំពីបញ្ហាតម្លៃប័ណ្ណដែលប្រជាពលរដ្ឋខ្មែរ និងប្រជាពលរដ្ឋថៃចេញ-ចូល អំឡុងពេលបុណ្យចូលឆ្នាំថ្មីប្រពៃណីជាតិ នាពេលមុខ។

សម្ដេចធិបតី ហ៊ុន ម៉ាណែត បានថ្លែងថា «ខ្ញុំបានជជែកជាមួយគាត់ (នាយករដ្ឋមន្ត្រីថៃ) ថា ឯកឧត្ដម ឥឡូវអញ្ចេះ យើងជិតចូលឆ្នាំកាដូជូនប្រជាពលរដ្ឋយើង ទាំងសងខាងទៅ ឥឡូវតម្លៃសេវាទិដ្ឋការអនុញ្ញាតបងប្អូនចេញ-ចូលហ្នឹង យើងមិនបាច់យកទេ អញ្ចឹងប្រជាពលរដ្ឋខ្មែរមកលេងពេលចូលឆ្នាំ ទៅវិញមិនបាច់បង់ថ្លៃ Re entry ហ្នឹងទេ គាត់ថា ឯកភាព »។

សម្ដេចនាយករដ្ឋមន្ត្រី ក៏បានឲ្យដឹងបន្ថែមថា នាយករដ្ឋមន្ត្រីថៃ លោក សេដ្ឋា ថាវីស៊ីន កំពុងគិតពិចារណាថា នៅក្នុងខែមេសា ឆ្នាំ ២០២៤ខាងមុខនេះ អាចនឹងមិនយកថ្លៃចេញ-ចូលព្រំដែនតែម្ដង ឬមួយយ៉ាងណា។ «ឥឡូវកំពុងតែគិត គាត់ផ្ដល់ជាសញ្ញាវិជ្ជមានហើយ អាចថា មួយខែមេសាហ្នឹង គឺគាត់មិនយក ចាំគេប្រកាស អញ្ចឹងសប្បាយទៀត»។ នេះជាការបញ្ជាក់បន្ថែមរបស់សម្ដេចធិបតី ហ៊ុន ម៉ាណែត៕