បង្គាចាក់ចាហួយ ជាង ៤តោន ត្រូវបានបង្ក្រាប និងយកទៅដុតកម្ទេចចោល

កម្លាំងការិយាល័យនគរបាលប្រឆាំងបទល្មើសសេដ្ឋកិច្ច សហការជាមួយអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) រាជធានីភ្នំពេញ បានចុះបង្ក្រាបបង្គាចាក់ចាហួយ និងផ្ទុកសារធាតុគីមីជាង ៤តោន និងបានយកទៅដុតកម្ទេចចោល នៅថ្ងៃទី៨ ខែកុម្ភៈ ឆ្នាំ២០២៤ ។

សមត្ថកិច្ចជំនាញសហការជាមួយ ក.ប.ប. រាជធានីភ្នំពេញ បានចុះបង្ក្រាបការនាំចូលបង្គាចាក់ចាហួយ និងផ្ទុកសារធាតុគីមី ចំនួន២៦៦ កេះ ស្មើនឹង ៤២៦៨គីឡូក្រាម ដែលធ្វើឱ្យប៉ះពាល់ដល់សុខភាពប្រជាពលរដ្ឋជាអ្នកប្រើប្រាស់។ បច្ចុប្បន្ន កម្លាំងការិយាល័យនគរបាលប្រឆាំងបទល្មើសសេដ្ឋកិច្ច និង ក.ប.ប. រាជធានីភ្នំពេញ បានយកទៅបំផ្លាញចោលតាមនីតិវិធី។

លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និង ក.ប.ប រាជធានីភ្នំពេញ បានអំពាវនាវដល់សមត្ថកិច្ចពាក់ព័ន្ធ ចូលរួមទប់ស្កាត់រាល់បទល្មើសនានា ដែលនាំចូល ធ្វើឱ្យប៉ះពាល់ដល់សុខភាពប្រជាពលរដ្ឋជាអ្នកប្រើប្រាស់។ ដោយឡែក កម្លាំងជំនាញនៃស្នងការដ្ឋាននគរបាលរាជធានីភ្នំពេញ នូវតែបន្តស្រាវជ្រាវ ស៊ើបអង្កេត បង្ក្រាបរាល់នាំចូលផលិតផលគ្មានគុណភាព គ្មានសុវត្ថិភាព ដែលប៉ះពាល់ដល់សុខភាពប្រជាពលរដ្ឋ៕