ព័ត៌មានជាតិ

ក្រសួងសាធារណការចេញវីដេអូផ្សព្វផ្សាយ បញ្ចៀសការកកស្ទះផ្លូវល្បឿនលឿនថ្ងៃចូលឆ្នាំចិន

បានផុស

១២ ខែ មុន

នៅ

ថ្ងៃសៅរ៍ ១០ កុម្ភៈ ២០២៤

ដោយ

ក្រសួងសាធារណការនិងដឹកជញ្ជូនបានចេញវិដេអូផ្សព្វផ្សាយពីការប្រើប្រាស់គន្លងចូលចេញផ្លូវល្បឿនលឿនឲ្យបានត្រឹមត្រូវ ដើម្បីចូលរួមកាត់បន្ថយការកកស្ទះ និងចំណេញពេលវេលា។

ក្នុងឃ្លីបវីដេអូផ្សព្វផ្សាយ ក្រសួងសាធារណការ និងដឹកជញ្ជូនក៏បានណែនាំជំរុញឲ្យអ្នកប្រើប្រាស់ផ្លូវល្បឿនលឿនស្វែងយល់និងប្រើប្រាស់ប្រព័ន្ធចេញចូលស្វ័យប្រវត្តិ ETC ដោយមិនចំណាយពេលរង់ចាំយូរ និងកាត់បន្ថយការកកស្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីចេញចូលតាមគន្លងស្វ័យប្រវត្តិ ETC ដែលនៅខាងឆ្វេងបង្អស់ តម្រូវឱ្យមានបំពាក់ឧបករណ៍ ETC នៅជាប់កញ្ចក់រថយន្ត រួចបញ្ចូលសមតុល្យជាមុនតាមរយៈធនាគារដៃគូ។ សូមចូលទៅកាន់គេហទំព័រ https://ew.mpwt.gov.kh ដេីម្បីដឹងពីវិធីបញ្ចូលសមតុល្យ និងពិនិត្យសមតុល្យទឹកប្រាក់ដែលបានបញ្ចូល។

ករណីចង់បំពាក់ឧបករណ៍ ETC បងប្អូនអាចស្នើសុំតាមវិធីងាយៗ នៅតាមការិយាល័យស្ថានីយទាំង ៨ទីតាំង, នៅមណ្ឌលផ្តល់សេវាសាធារណៈ ទីស្តីការក្រសួងសាធារណការ និងដឹកជញ្ជូន និងមណ្ឌលផ្តល់សេវាសាធារណៈ នៅផ្សារទំនើប Aeon មានជ័យ ដោយនាំយករថយន្តដែលត្រូវបំពាក់ទៅជាមួយ រួមនឹងឯកសារតម្រូវ(ច្បាប់ដើម) ដូចជា៖

(១) អត្តសញ្ញាណបណ្ណ

(២) វិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត(ឆៀក) និង

(៣)បណ្ណសម្គាល់យានយន្ត(កាតគ្រី)។

សម្រាប់បងប្អូនដែលនៅមិនទាន់មានឧបករណ៍ ETC សូមប្រើប្រាស់គន្លងធម្មតាតម្រូវឱ្យយកកាតនៅច្រកចូលនិងបង់សាច់ប្រាក់នៅច្រកចេញ។ ក្នុងករណីមានចរាចរណ៍មមាញឹក បងប្អូនអាចប្រឈមនឹងការរង់ចាំយូរពេលទូទាត់ និងអាប់សាច់ប្រាក់នៅច្រកចេញ៕