ព័ត៌មានជាតិ

ព្រែកកំពត បំពុលដោយទឹកកខ្វក់រាប់ឆ្នាំ នឹងស្អាតគ្មានទឹកស្អុយហូរចូលទៀតទេ

បានផុស

៤ years មុន

នៅ

ថ្ងៃពុធ ១៧ កុម្ភៈ ២០២១

ដោយ

ទឹកស្អុយកខ្វក់ហូរចូលព្រែកកំពតនឹងលែងមានទៀតហើយ នៅពេលដែលអាជ្ញាធរខេត្តកំពុងសាងសង់ប្រព័ន្ធលូបង្វែរទឹកកខ្វក់ និងស្ថានីយចម្រោះទឹកកខ្វក់បានរួចរាល់ហើយសព្វគ្រប់។

បញ្ហាទឹកលូកខ្វក់ហូរចូលទៅក្នុងព្រែកកំពត បានកើតមានឡើងជាច្រើនឆ្នាំមកហើយ ដែលនាំឲ្យមានក្លិនស្អុយ ប៉ះពាល់ដល់បរិស្ថានទឹកសមុទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជាវ តាយ អភិបាលខេត្តកំពតបានប្រាប់កម្ពុជាថ្មីនៅថ្ងៃទី ១៦ ខែកុម្ភៈនេះថា បច្ចុប្បន្នអាជ្ញាធរកំពុងសាងសង់ប្រព័ន្ធបង្វែរទឹកស្អុយមិនឲ្យហូរចូលព្រែកកំពង់បាយដែលធ្លាប់កើតមានឡើងជាច្រើនឆ្នាំមកហើយ។

គម្រោងសាងសង់ស្ថានីយចម្រោះទឹកកខ្វក់របស់ ADB ដែលមកដល់ពេលនេះ សម្រេចបានប្រមាណ៦០%។ នៅពេលដែលស្ថានីយនេះសាងសង់រួចរាល់ អាជ្ញាធរមិនឲ្យទឹកកខ្ខក់ហូរចូលទៅក្នុងព្រែកទៀតទេឲ្យតែទឹកភ្លៀង ចំណែកទឹកដែលជាសំណល់រាវគឺត្រូវមានចម្រោះមួយនៅមាត់ព្រែក ហើយរុញទៅស្ថានីចម្រោះ ទើបទម្លាក់ទៅសមុទ្រវិញ។

ឯកឧត្តម ជាវ តាយ អភិបាលនៃគណៈអភិបាលខេត្តកំពត

លោកបន្តថា ជាគោលដៅ គឺមិនឲ្យមានការធ្លាក់ទឹកចូលទៅដៃព្រែកកំពង់បាយទេ ប្រសិនបើទម្លាក់ទៅធ្វើឲ្យទឹកនោះ កាន់តែកខ្វក់ថែមទៀត។

អភិបាលខេត្តក៏លើកឡើងពីបញ្ហាពាក់ព័ន្ធនឹងសំរាម ដែលបងប្អូនប្រជាពលរដ្ឋរស់នៅតាមដងព្រែក ដែលតែងតែបោះចូលក្នុងទឹកព្រែក។ អាជ្ញាធរនឹងចាត់វិធានការចុះទប់ស្កាត់ប្រមូលសំរាមពីទីតាំង និងផ្សព្វផ្សាយកុំឲ្យប្រជាពលរដ្ឋបន្តទម្លាក់សំរាមចូលទៅក្នុងទឹកបន្តទៀត”។

សូមជម្រាបថា ការអនុវត្តគម្រោងសាងសង់ប្រព័ន្ធលូប្រមូលទឹកកខ្វក់ ស្ថានីយអាងប្រព្រឹត្តិកម្មទឹកកខ្វក់ និងប្រព័ន្ធរំដោះទឹកភ្លៀង នៃគម្រោងអភិវឌ្ឍន៍ក្រុងរបៀង២របស់ ធនាគារអភិវឌ្ឍន៍អាស៊ី ADB នឹងកាន់តែលើកមុខមាត់សោភ័ណភាពក្នុងខេត្តកំពតកាន់តែល្អជាងមុន។

ម្យ៉ាងទៀតពេលគម្រោងនេះសាងសង់រួចរាល់ នឹងអាចធានាបាននូវអនាម័យបរិស្ថានស្អាត នាំមកនូវសោភណភាព ផាសុកភាពទាក់ទាញទេសចរឱ្យកាន់តែច្រើនទៅខេត្តកំពត៕