មន្ទីរទេសចរណ៍ ជំរុញអាជីវករផ្តល់សេវាល្អ និងតម្លៃសមរម្យដល់ភ្ញៀវទេសចរមកលេងខេត្តព្រះសីហនុ

មន្ទីរទេសចរណ៍ខេត្តព្រះសីហនុ បានស្នើឱ្យអាជីវករទាំងអស់ ចូលរួមផ្ដល់សេវាកម្មឱ្យបានល្អ និងតម្លៃសមរម្យ ដើម្បីឱ្យភ្ញៀវទេសចរមកកម្សាន្ដប្រកបដោយភាពរីករាយ និងត្រឡប់មកលេងកម្សាន្ដនៅពេលក្រោយទៀត ។

ជាមួយគ្នានេះ មន្ទីរទេសចរណ៍ខេត្ត ក៏បានលើកទឹកចិត្តដល់ភ្ញៀវទេសចរដែលបានដើរលេងកម្សាន្ដតាមរមណីយដ្ឋាននានា ចូលរួមទុកដាក់សំរាមឱ្យបានត្រឹមត្រូវ និងបន្ដថែរក្សា អនាម័យ ដើម្បីរមណីយដ្ឋានក្នុងខេត្តស្អាត មានភ្ញៀវមកលេងច្រើនបន្ថែមទៀត។

សូមបញ្ជាក់ថា កាលពីព្រឹកថ្ងៃទី១០ខែ កុម្ភៈ ឆ្នាំ ២០២៤ មាននាវាទេសចរណ៍មួយគ្រឿងឈ្មោះ AIDABELLA សញ្ជាតិ ITALY មានបណ្ដោយ ប្រវែង ២៥១.៨៩ម៉ែត្រ និងទទឹងប្រវែង ៣៧.៦ម៉ែត្រ ជម្រៅទឹក ៧.៣ម៉ែត្រ មកពីប្រទេសវៀតណាម បានចូលចតនៅកំពង់ផែក្រុងព្រះសីហនុ វេលាម៉ោង ០៧:៤០នាទី​ ដោយមានភ្ញៀវទេសចរ សរុប ១៩៧៦នាក់ ស្រី ១០២៩នាក់ មាន ២០សញ្ជាតិ និងនាវិកចំនួន ៦២៥នាក់ស្រី ១៣១នាក់ ចំនួន ២៨សញ្ជាតិ​។

ភ្ញៀវទេសចរភាគច្រើនជាងគេជនជាតិ អាល្លឺម៉ង ១៨១០នាក់​ អូទ្រីស ៥១នាក់ ។ ទន្ទឹមនេះគោលដៅភ្ញៀវទេសចរទៅទស្សនាមានតំបន់ឆ្នេរ វត្តអារាម និងផ្សារនៅក្រុងព្រះសីហនុ ភ្នំពេញ សៀមរាប កំពត កែប និងកំពង់ស្ពឺ ជាដើម។

នាវាទេសចរណ៍នេះ នឹងចាកចេញពីប្រទេសកម្ពុជានៅម៉ោង ៦ល្ងាចនេះ ឆ្ពោះទៅប្រទេសថៃបន្តទៀត៕