​ក្រសួងធនធានទឹក និងឧតុនិយម៖ សីតុណ្ហភាពចុះត្រជាក់​នៅពេលព្រឹក​

ក្រសួងធនធានទឹក និងឧតុនិយមបានប្រកាសនៅថ្ងៃទី ១២ ខែកុម្ភៈ ឆ្នាំ ២០២៤ នេះថា ទ្រនុង​សម្ពាធខ្ពស់​ពីប្រទេស​ចិន និងខ្យល់មូសុងឦសាន​បន្តបង្កើនឥទ្ធិពល​ និងល្បឿនបក់​មកលើកម្ពុជា ដែលស្ថានភាពបែបនេះនឹងធ្វើឱ្យតំបន់ជួរភ្នំដងរែក និងតំបន់ខ្ពង់រាបភាគឦសាន​ធាតុអាកាសត្រជាក់នៅពេលព្រឹក។

សម្រាប់តំបន់វាលទំនាប សីតុណ្ហភាពអប្បបរមាពី២០-២៦°C និងសីតុណ្ហភាពអតិបរមាពី៣៣-៣៦°C ហើយខ្យល់បក់មកពីទិសឦសាន ក្នុងល្បឿនពី៣-៥ម៉ែត្រ/វិនាទី។ ​នៅថ្ងៃទី១២-១៣ ខែកុម្ភៈ ខេត្តប៉ៃលិន ធាតុអាកាសត្រជាក់នៅពេលព្រឹកជាមួយនឹងសីតុណ្ហភាពអប្បបរមារង្វង់១៩°C។

ចំណែកឯតំបន់ខ្ពង់រាប សីតុណ្ហភាពអប្បបរមាពី១៧-២៥°C សីតុណ្ហភាពអតិបរមាពី៣២-៣៥°C ហើយ នៅថ្ងៃ​ទី​១២-១៣ ខែកុម្ភៈ ខេត្តមណ្ឌលគិរី រតនគិរី ព្រះវិហារ និងខេត្តឧត្តរមានជ័យ ធាតុអាកាស​ត្រជាក់នៅពេលព្រឹកជាមួយនឹងសីតុណ្ហភាពអប្បបរមាពី១៧-១៩°C ហើយខ្យល់​បក់មកពីទិស​ឦសាន​ក្នុងល្បឿនពី៤-៦ម៉ែត្រ/វិនាទី។

ដោយឡែក តំបន់មាត់សមុទ្រ សីតុណ្ហភាពអប្បបរមាពី២៣-២៥°C និងសីតុណ្ហភាពអតិបរមាពី៣២-៣៥°C ហើយខ្យល់បក់មកពីទិសឦសានក្នុងល្បឿនពី៣-៥ម៉ែត្រ/វិនាទី ខណៈរលកសមុទ្រ​មានកម្ពស់​ពី០,៧៥-១,៧៥ម៉ែត្រ៕