យានយន្តចរាចរណ៍​លើផ្លូវល្បឿនលឿនប្រមាណ ២ ម៉ឺន​គ្រឿង គិតត្រឹមម៉ោង ៦ ល្ងាចម្សិលមិញ

នា​ឱកាស​ថ្ងៃ​ចូលឆ្នាំចិន គិតត្រឹមម៉ោង ៦ ល្ងាចម្សិលមិញមានយានយន្តចរាចរណ៍លើផ្លូវល្បឿនលឿនចំនួន ២៣ ៤៥២ គ្រឿង។ នេះ​បើតាម​ការ​ឲ្យដឹង​របស់​មន្រ្តីអ្នកនាំពាក្យ​ក្រសួង​សាធារណការ​និង​ដឹកជញ្ជូន។

លោក ផន រីម មន្រ្តី​អ្នកនាំពាក្យ​ក្រសួង​សាធារណការ​និង​ដឹកជញ្ជូនបាន​បញ្ជាក់​ថា គិតត្រឹមម៉ោង ៦ ល្ងាចម្សិលមិញ មានយានយន្តចរាចរណ៍លើផ្លូវល្បឿនលឿនចំនួន ២៣.៤៥២ គ្រឿង (ម្សិលមិញចំនួន ១៨.៧០៧គ្រឿង) និងមិនមានគ្រោះថ្នាក់ចរាចរណ៍ ឬបាតុភាពអ្វីកើតឡើងនោះទេ។

លោកបន្ត​ថា នៅថ្ងៃអាទិត្យទី១១ ខែកុម្ភ: ឆ្នាំ២០២៤ ចរាចរណ៍លើផ្លូវល្បឿនលឿនភ្នំពេញ-ព្រះសីហនុ មិនមានការកកស្ទះយូរនៅច្រកចេញភ្នំពេញ បន្តកន្ទុយគ្នាប្រមាណ ១៥០ ម៉ែត្រប៉ុណ្ណោះ។ យានយន្តបានរំកិលខ្លួនចូលបញ្ជរបង់ប្រាក់តាមកន្លងប្រភេទទូទាត់បានយ៉ាងរលូន។

បើតាម​មន្រ្តីក្រសួង​សាធារណការ​រូបនេះ ប្រជាពលរដ្ឋមានការយល់ដឹងកាន់តែច្រើននិងមានការសម្រួលពីសមត្ថកិច្ចនគរបាលផ្លូវល្បឿនលឿន និងដោយបានអនុវត្តបើកច្រកបន្ថែមបញ្ចាទិសជានីតិវិធីថ្មីដែលបានត្រៀមទុកមុន ដើម្បីបញ្ចៀសការកកស្ទះយូរ៕