អំឡុងពេលចូលឆ្នាំចិន មានអគ្គិភ័យកើតឡើង ១៣ករណី

តាមរបាយការណ៍ពីនាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានឱ្យដឹងថា រយៈពេល ៣ថ្ងៃ​ នៃពិធីបុណ្យចូលឆ្នាំចិន ឆ្នាំ២០២៤ នេះ មានករណីអគ្គីភ័យកើតឡើងចំនួន ១៣ករណី ហើយបើធៀបទៅនឹង ឆ្នាំ២០២៣ គឺមានចំនួនស្មើគ្នា។

របាយការណ៍ដដែល បានបញ្ជាក់ថា ករណីអគ្គិភ័យទាំង ១៣លើកនេះ បានបណ្តាលឱ្យ ឆេះផ្ទះចំនួន៩ខ្នង បន្ទប់ចំនួន២ ម៉ូតូ ៣គ្រឿង និងផ្ទះសិប្បកម្ម ១ខ្នង។ ចំពោះ មូលហេតុដែលនាំឱ្យមានអគ្គិភ័យនេះកើតឡើង គឺបណ្តាលមកពី ឆ្លងចរន្តអគ្គិសនីចំនួន ៦លើក ប្រើប្រាស់ភ្លើងចំនួន ៥លើក និង២លើកទៀតមន្ត្រីជំនាញនៅមិនទាន់រកមូលហេតុឃើញនៅឡើយទេ។ សម្រាប់ហេតុការណ៍ទាំងនេះដែរ មិនបណ្តាលឱ្យមានអ្នកស្លាប់ និងរបួសនោះឡើយ។

គួររម្លឹកឡើងវិញថា នៅមុនពេលពិធីបុណ្យចូលឆ្នាំចិន ស្នងការរដ្ឋាននគរបាលរាជធានីភ្នំពេញ ក៏បានចេញសេក្តីណែនាំឱ្យទីកន្លែងកម្សាន្តសប្បាយនានា មន្ទីរ អង្គភាព រោងចក្រ សហគ្រាស គេហដ្ឋាន ត្រូវរក្សាសន្តិសុខ សុវត្ថិភាព សណ្ដាប់ធ្នាប់សាធារណៈ ត្រូវប្រុងប្រយ័ត្នចំពោះការអុជទៀនធូប ក្រដាសសែន ភ្លើងចង្ក្រាន ចរន្តអគ្គិសនី ដែលអាចបង្កឱ្យមានគ្រោះអគ្គិភ័យកើតឡើងជាយថាហេតុផងដែរ៕