បឹងពារាំងទំហំ២៥០ហិកតា ក្នុងខេត្តសៀមរាប  ជាជម្រកមច្ឆាជាតិ និងសត្វស្លាបជាង១៧០ប្រភេទ

បឹងពារាំងជាបឹងដ៏ធំល្វឹងល្វើយ និងជាទីជម្រកមច្ឆាជាតិនិងជីវចម្រុះ-ជីវសាស្រ្ត ព័ទ្ធដោយព្រៃលិចទឹកដែលជាជម្រកត្រីមេពូជ និងសត្វស្លាបប្រមាណជាង១៧០ ប្រភេទ។ បឹងនេះគ្របដណ្តប់ផ្ទៃទឹក២៥០ហិចតានារដូវប្រាំង ទីតាំងជាប់សង្កាត់ជ្រាវ-សង្កាត់សៀមរាប ចំងាយ ១៣គម ខាងត្បូងទីក្រុងសៀមរាប និង ២គម ខាងជើងបឹងទន្លេសាប។

  ដោយទទួលបានច្បាប់ពីក្រសួងមហាផ្ទៃ បច្ចុប្បន្នបឹងពារាំង ឬតំបន់អភិរក្សជីវចម្រុះបឹងពារាំង ត្រូវការពារ និងអភិរក្សយ៉ាងយកចិត្តទុកដាក់ និងទទួលខុសត្រូវខ្ពស់បំផុត ដោយសមាគម សហគមន៍ទេសចរណ៍ វប្បធម៌ ធម្មជាតិ បឹងពារាំង-សង្កាត់ជ្រាវ ។

   សកម្មភាពនៃការការពារនិងអភិរក្សរបស់ប្រជាសហគមន៍ជ្រាវ បានប្រែក្លាយតំបន់នេះទៅជាមណ្ឌលដ៏សុខសាន្តសំរាប់ ត្រីមេពូជ ព្រៃលិច និងសត្វស្លាបទឹក ដែលបលញាំងអោយតំបន់នេះក្លាយទៅជាតំបន់គោលដៅទាក់ទាញថ្មី សំរាប់ទេសចរជាតិ និងអន្តរជាតិ អោយមកទស្សនា និងផ្តិយករូបភាពនៃទេសភាពបៃតង សត្វស្លាបទឹក សត្វស្លាបដីសើម រាប់រយប្រភេទ។

ដើម្បីប្រយោជន៍ទៅថ្ងៃអនាគត មន្ត្រីសហគមន៍ទេសចរណ៍ធម្មជាតិបឹងពារាំង បានសំណូមពរទៅពលរដ្ឋមេត្តាបញ្ឈប់ការបបាញ់សត្វនិងនេសាទត្រីដែលខុសច្បាប់។

  មន្ត្រីសហគមន៍ បន្ថែមថា ទេសភាពនៅតំបន់ទេសចរណ៍ធម្មជាតិបឹងពាររាំង មានភាពស្រស់ស្អាត ពួកគាត់នៅរង់ចាំទទួលភ្ញៀវទេសចរណ៍ជាតិនិងអន្តរជាតិមកកម្សាន្តនិងផ្ដិតយករូបភាពដ៏ស្រស់ស្អាតទាំងនេះដោយភាពកក់ក្តៅបំផុត៕

  អត្ថបទ៖ ជុន កុសល