មន្ត្រី ជំរុញសិស្សបង្វែរទិវាក្តីស្រលាញ់ មកខិតខំសិក្សា បង្ហាញក្តីស្រលាញ់ជូនអ្នកមានគុណ

មន្ត្រីជាន់ខ្ពស់ ក្រសួងអប់រំ យុវជន និងកីឡា បានជំរុញដល់សិស្សានុសិស្សបង្វែរទិវានៃក្តីស្រលាញ់មកខិតខំប្រែងប្រែងរៀនសូត្រឱ្យទទួលបានលទ្ធផលល្អប្រសើរ ដើម្បីបង្ហាញពីក្តីស្រឡាញ់ដល់អ្នកមានគុណ លោកគ្រូអ្នកគ្រូវិញ ជាជាងយកទិវានេះទៅប្រព្រឹត្តិនូវអំពើអបាយមុខផ្សេងៗដែលសង្គមស្អប់ខ្ពើម។

លោក ស្រី ឃួន វិច្ឆិកា អ្នកនាំពាក្យ ក្រសួងអប់រំ យុវជន និងកីឡា បានមានប្រសាសន៍នៅរសៀល ថ្ងៃទី១៣ ខែកុម្ភៈ នេះ ដោយណែនាំឱ្យគណៈគ្រប់គ្រងសាលារៀន លោកគ្រូអ្នកគ្រូ មាតាបិតា អាណាព្យាបាល អប់រំពន្យល់ដល់ប្អូនៗសិស្សានុសិស្ស ថា ទិវានៃក្តីស្រលាញ់នេះមិនមែនជាបុណ្យប្រពៃណីជាតិខ្មែរទេ។

ជាមួយគ្នានេះដែរ លោកស្រីក៏បានណែនាំដល់សិស្សានុសិស្សបង្វែរទិវានេះ មកជាការអនុវត្តតាមបទបញ្ជាផ្ទៃក្នុងសាលា ស្តាប់ដំបូន្មានមាតាបិតាឱ្យបានខ្ជាប់ខ្ជួន និងខិតខំរៀនសូត្រឱ្យមានលទ្ធផលល្អ ដើម្បីបង្ហាញពី ក្តីស្រឡាញ់ចំពោះអ្នកមានគុណមាតាបិតា គ្រូ និងមិត្តល្អវិញ។

រៀលរាល់ឆ្នាំ នៅទី១៤ ខែកុម្ភៈ ប្រទេសនៅលោកខាងលិចមួយចំនួន តែងប្រារព្ធធ្វើទិវា នៃក្ដីសេចក្ដីស្រលាញ់ចំពោះឪពុកម្ដាយ អ្នកមានគុណ គូរសង្សារជាដើម ​ដើម្បីបញ្ចាក់ពីការស្រលាញ់ និងការដឹងគុណ ផងដែរ។ ចំណែកនៅប្រទេសកម្ពុជាវិញ ក៏មានយុវជនមួយចំនួនបានប្រារព្ធ ទិវានៃក្ដីស្រលាញ់នេះ បានត្រឹមត្រូវ ស្របតាមប្រពៃណី​ ទំនៀមទម្លាប់ ដូចជា ធ្វើចំពោះលោកអ្នកមានគុណ ឪពុកម្ដាយ បងប្អូន ភរិយា​ស្វាមី និងមនុស្សជាទីស្រលាញ់ជាដើម។ តែក៏នៅមានយុវជនមួយចំនួន​តូចភ្លើតភ្លើន​បានយកទិវានេះទៅប្រព្រឹត្តិនូវអំពើអបាយមុខផ្សេងៗប្រាសចាក វប្បធម៌ និងប្រពៃណីដ៏ផូរផង់របស់ខ្មែរ៕

អត្ថបទ៖ សំអឿន