ស្អែក ព្រះមហាក្សត្រ នឹងយាងសួរសុខទុក្ខ  និងប្រទានអំណោយដល់កម្មករប្រមូលសំរាម  នៅកោះនរា

ព្រឹកស្អែក ថ្ងៃទី១៤ ខែកុម្ភៈ ព្រះករុណា ព្រះបាទ សម្ដេចព្រះបរមនាថ  នរោត្តម  សីហមុនី  ព្រះមហាក្សត្រនៃកម្ពុជា នឹងយាងចុះសួរសុខទុក្ខ កម្មករ កម្មការិនី   ប្រមូលសំរាម និងសម្អាតទីក្រុង ដែលនឹងប្រារព្វធ្វើឡើងនៅទីតាំងកោះនរា ខណ្ឌច្បារអំពៅ រាជធានីភ្នំពេញ។

 ក្នុងព្រះរាជពិធីនេះ ព្រះមហាក្សត្រ នឹងយាងសួរសុខទុក្ខ និងប្រោសព្រះរាជទានអំណោយដល់ក្រុមកម្មករ  កម្មការិនី  ប្រមូលសំរាម  និងសម្អាតទីក្រុង មកពីក្រុមហ៊ុន ៣  ចូលរួមរួមមានក្រុមហ៊ុន Cintri Cambodiaក្រុមហ៊ុន 800 SUPER/GAEA និង ក្រុមហ៊ុន Mizuda Group Co.,Ltd។

គួរឱ្យដឹងថា ដើម្បីត្រៀមលក្ខណៈរៀបចំកម្មវិធីនៅព្រឹកស្អែកឱ្យបានរលូន នៅរសៀលថ្ងៃអង្គារ៍នេះ លោកឃួង  ស្រេង  អភិបាលរាជធានីភ្នំពេញ បានអមដំណើរឧកញ៉ាមហាមន្រ្តី  គុយ  សុផល  ឧត្តមប្រឹក្សាផ្ទាល់ព្រះមហាក្សត្រ  និងជាទេសរដ្ឋមន្រ្តីទទួលបន្ទុកកិច្ចការទូទៅអម ក្រសួងព្រះបរមរាជវាំង  ចុះពិនិត្យទីតាំងព្រះរាជពិធី៕

អត្ថបទ៖ ស្រីរ័ត្ន