ព័ត៌មានជាតិ

កម្ពុជា ចំណាយលើការនាំចូលដែកមានតម្លៃជាង ៤៥លានដុល្លារ កើនឡើង ៤៤% ក្នុងខែមករា

បានផុស

១២ ខែ មុន

នៅ

ថ្ងៃពុធ ១៤ កុម្ភៈ ២០២៤

ដោយ

កម្ពុជា បានចំណាយប្រាក់នាំចូលដែក និងដែកថែប មានតម្លៃប្រមាណជាង ៤៥លានដុល្លារ នៅក្នុងខែមករា ឆ្នាំ ២០២៤ ដើម្បីបំពេញតម្រូវការក្នុងស្រុក ពោលគឺមានការកើនឡើងចំនួន ៤៤% បើធៀបនឹងរយៈពេលដូចគ្នាកាលពីឆ្នាំ ២០២៣ មានចំនួនជាង ៣១លានដុល្លារ។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីឆ្នាំ ២០២០ មកវិស័យសំណង់នៅកម្ពុជាមិនមានដំណើរការល្អទេ ជាពិសេសគម្រោងធំៗដែលមានម្ចាស់ជាវិនិយោគិនបរទេស។ ដោយសារមិនសូវមានគម្រោងធំៗ ដូច្នេះតម្រូវការដែកក្នុងវិស័យសំណង់ក៏មិនមានបរិមាណច្រើននោះដែរ។ អ្នកជំនាញសាងសង់ បានលើកឡើងថា ការសាងសង់នាពេលនេះភាគច្រើនជាសំណង់លំនៅឋានសម្រាប់បំពេញតម្រូវការប្រជាជនក្នុងស្រុក និងវិនិយោគដោយក្រុមហ៊ុនក្នុងស្រុកតែប៉ុណ្ណោះ។ ទោះយ៉ាងណា យោងតាមរបាយការណ៍គយ បង្ហាញថា ការនាំចូលដែកមានកំណើននាដើមឆ្នាំ ២០២៤នេះ បានឆ្លុះបញ្ចាំងពីតម្រូវការនៃការសាងសង់កើនឡើងនៃវិស័យសំណង់នៅកម្ពុជា។

សម្រាប់ដែក ដែលប្រើប្រាស់នៅក្នុងវិស័យសំណង់កម្ពុជាភាគច្រើននាំចូលមកពីប្រទេសវៀតណាម ចិន និងថៃ។

សូមបញ្ជាក់ថា កាលពីឆ្នាំ ២០២៣ កម្ពុជា បានចំណាយទៅលើការនាំចូលដែក និងដែកថែប គិតជាថវិកាអស់ប្រមាណជាង ៣៧២លានដុល្លារ កើនឡើង ៣,៥% បើធៀបនឹងរយៈពេលដូចគ្នា កាលពីឆ្នាំ ២០២២ មានចំនួនជិត ៣៦០លានដុល្លារអាមេរិក។ នេះបើតាមអគ្គនាយកដ្ឋានគយ និងរដ្ឋាករកម្ពុជា។

លើសពីនេះទៀត កម្ពុជា ក៏បាននាំចូលវត្ថុធ្វើពីដែក និងដែកថែប មានតម្លៃសរុបជិត ៥៣០លានដុល្លារ ផងដែរ នៅឆ្នាំ ២០២៣៕