ព័ត៌មានជាតិ

សមត្ថកិច្ច និងមន្ត្រីកាកបាទក្រហមខេត្តកោះកុង ពន្យល់ពលរដ្ឋពីវិធីប្រើប្រាស់បំពង់ពន្លត់អគ្គិភ័យ ពេលមានគ្រោះមហន្តរាយកើតឡើង

បានផុស

១១ ខែ មុន

នៅ

ថ្ងៃពុធ ១៤ កុម្ភៈ ២០២៤

ដោយ

នគរបាលជំនាញ និងក្រុមមន្ត្រីសាខាកាកបាទក្រហមកម្ពុជាខេត្តកោះកុង បានរួមគ្នាចុះពន្យល់ណែនាំ និងប្រាប់ពីវិធីសាស្ត្រប្រើប្រាស់បំពង់ពន្លត់អគ្គិភ័យពេលមានគ្រោះថ្នាក់មហន្តរាយឆាបឆេះកើតឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ មនោ សមាជិកគណៈកម្មាធិការសាខាកាកបាទក្រហមកម្ពុជាខេត្តកោះកុង បានឱ្យដឹងនៅថ្ងៃទី ១៤ ខែកុម្ភៈ ឆ្នាំ ២០២៤ នេះថា លោក និងកម្លាំងការដ្ឋាននគរបាលខេត្តកោះកុង បើកវគ្គផ្សព្វផ្សាយវិធានការស្តីពីការបង្ការពន្លត់អគ្គិភ័យ និងសង្គ្រោះ ដល់ប្រជាពលរដ្ឋជិត ៦០ នាក់ នៅសង្កាត់ដងទង់ ក្រុងខេមរភូមិន្ទ កាលពីថ្ងៃទី ១៣ ខែកុម្ភៈ ម្សិលមិញ ដើម្បីផ្តល់ចំណេះដឹងចេះថែទាំទុកដាក់ និងត្រួតពិនិត្យបំពង់ ឱ្យត្រូវតាមបច្ចេកទេស។

លោក គង់ មនោ អះអាងថា វគ្គផ្សព្វផ្សាយពីការប្រើប្រាស់បំពង់ពន្លត់អគ្គិភ័យពេលមានគ្រោះមហន្តរាយកើតឡើង ក៏ជាចំណែកមួយធ្វើឱ្យប្រជាពលរដ្ឋបានយល់ដឹង និងមានភាពជាម្ចាស់ការ ក្នុងគ្រាមានអាសន្ន អាចចេះប្រើប្រាស់ឧបករណ៍ពន្លត់អគ្គិភ័យ និងការជម្លៀសជនរងគ្រោះចេញពីកន្លែងគ្រោះថ្នាក់ទៅកន្លែងមានសុវត្ថិភាព អំពីគ្រោះអគ្គិភ័យដែលកើតឡើងដោយការធ្វេសប្រហែស ដែលធ្លាប់កើតមានកន្លងមកដូចជា ការដាំស្លមិនពន្លត់ភ្លើង មិនបិទហ្គាស ការចាកចេញពីលំនៅឋានមិនបិទប៉ារ៉ែតភ្លើង ការអុជទៀន ធូប ការឆ្អើរត្រី ការលក់ប្រេងឥន្ធនៈ និងលក់ហ្គាស មិនប្រុងប្រយ័ត្នជាដើម។

ក្រុមការងារ នៃការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលខេត្តកោះកុង បានបង្ហាញបច្ចេកទេសក្នុងពេលជួបហានិភ័យពេលមានអគ្គិភ័យកើតឡើង និងចែករំលែកចំណេះដឹង និងជំនាញសំខាន់ៗ ចំនួន ២ ដល់ប្រជាពលរដ្ឋ គឺ ៖ ទី១-វិធីប្រើប្រាស់ ថែរក្សា បំពង់ពន្លត់អគ្គិភ័យ និងទី២-ការជម្លៀសជនរងគ្រោះចេញពីកន្លែងកើតហេតុ។ ទន្ទឹមនោះ សាខាកាកបាទក្រហមកម្ពុជាខេត្តកោះកុង ក៏បានផ្តល់ជូនបំពង់ពន្លត់អគ្គិភ័យចំនួន ៣០ បំពង់ ដល់ប្រជាពលរដ្ឋមានទីលំនៅប្រឈមនឹងគ្រោះអគ្គិភ័យទុកប្រើប្រាស់តាមតម្រូវការជាក់ស្ដែង៕

អត្ថបទ ៖ សិរីវឌ្ឍនៈ