​សមត្ថកិច្ច​បញ្ជូនបុរស​ចិនតៃវ៉ាន់ ២ នាក់​ ដែលថតសម្ដែងនៅខេត្តព្រះសីហនុ ​ទៅតុលាការ​

បុរសជនជាតិចិនតៃវ៉ាន់ ២ នាក់ ដែលបានធ្វើដំណើរចូលមកកម្ពុជា ហើយថតវីដេអូសម្ដែង​អំពើ​ឧក្រិដ្ឋ នៅតាមបណ្ដាតំបន់មួយចំនួននៅក្នុងខេត្តព្រះសីហនុ ត្រូវបាន​សមត្ថកិច្ច​បញ្ជូន​ទៅ​តុលាការ។

​លោក គួច ចំរើន ​អភិបាលខេត្តព្រះសីហនុ ​មានប្រសាសន៍ឱ្យដឹង​នៅក្នុងសន្និសីទសារព័ត៌មាន នៅ​រសៀលថ្ងៃទី១៥​ ខែកុម្ភៈ ​ឆ្នាំ ២០២៤ នេះថា បុរសជនជាតិចិនតៃវ៉ាន់ទាំងពីរនាក់ មានគម្រោង មកកម្ពុជាតាំងតែពីពាក់កណ្ដាលខែមករាកន្លង​ទៅ ដើម្បីថតពីអំពើចាប់ជំរិត និងបង្ខាំងមនុស្ស​នៅខេត្តព្រះសីហនុ។ ​

នៅថ្ងៃទី ១១ ខែកុម្ភៈ បុរសជនជាតិចិនតៃវ៉ាន់ទាំង២នាក់ បាន​ធ្វើដំណើរ​មកដល់​រាជ​ធានីភ្នំពេញ ហើយដើរកអាគារមួយចំនួន ដើម្បីថតសម្ដែង ប៉ុន្តែ​មិនមាន​ឱកាស ក៏បន្ត​ដំណើរទៅខេត្តព្រះសីហនុ ដោយឈប់ទិញសម្ភារស្បែកជើង មួក ស្រោមកាំភ្លើងនៅតំបន់ទឹកថ្លា។

​នៅយប់ថ្ងៃទី ១២ ខែកុម្ភៈ បុរសជនសង្ស័យទាំងពីរនាក់ បានចុះទៅអាគារ X នៅតំបន់អូរត្រេះ ខេត្ត​ព្រះសីហនុ ​ហើយធ្វើសកម្មភាព​ថតសម្ដែង ថាខ្លួនកំពុងត្រូវគេចាប់ជំរិត និងការធ្វើទារុណកម្ម។ នៅថ្ងៃបន្ទាប់ បុរសរូបនេះក៏បានចេញដំណើរទៅទីតាំងនោះម្ដងទៀត ដើម្បីថត ដោយ​ប្រាប់ពីស្ថានភាពរបួសស្នាម និងការរត់គេចពីទីតាំងចាប់ជំរិត។

​បុរសជនជាតិចិនតៃវ៉ាន់ ទី១ ឈ្មោះ CHEN NENG-CHUAN និងម្នាក់ទៀត ឈ្មោះ LU TSU-HSIEN។ បើ​តាមចម្លើយសារភាពរបស់ជនសង្ស័យប្រាប់ថា រូបគេមានគម្រោងផលិតមាតិការបែបនេះ ក្នុងគោល​ដៅទាក់ទាញ View តាមបណ្ដាញសង្គម ​ដើម្បីលក់ផលិតផល។​

​បុរសទាំងពីរនាក់ ត្រូវបញ្ជូនទៅតុលាការ ​ពីបទបង្កអំពើញុះញង់ ​ធ្វើឱ្យប៉ះពាល់ដល់សន្ដិសុខ​សង្គមធ្ងន់ធ្ងរ។​

កម្លាំងសមត្ថកិច្ចជំនាញ បានដកហូត​ស្រោមមុខខ្មោច​ កាំភ្លើងជ័រ​ សំលៀកបំពាក់ទាហានប៉ារ៉ា សម្ភារឧបករណ៍ផលិតVideo Live និងសម្ភារបម្រើឲ្យការថតវីដេអូមួយចំនួទៀត៕

​