សត្វទន្សោង ១ក្បាល ស្លាប់ ក្រោយជាប់អន្ទាក់បង្កជារបួសធ្ងន់ធ្ងរ

សត្វទន្សោងមួយក្បាល បានបាត់បង់ជីវិត នៅថ្ងៃព្រហស្បត្តិ៍នេះ ព្រោះជាប់អន្ទាក់របស់ព្រានព្រៃកាលពីពេលថ្មីៗ ដែលបណ្ដាលឱ្យរងរបួសត្រង់ជើងខាងស្ដាំធ្ងន់ធ្ងរ បើទោះបីជាធ្លាប់ទទួលបានការព្យាបាលយ៉ាងណាក៏ដោយ។

គួរឱ្យដឹងថា កាលពីពេលថ្មីៗនេះ មន្រ្តីខណ្ឌរដ្ឋបាលព្រៃឈើសៀមរាប បានព្យាយាមសង្រ្គោះ និងព្យាបាលបឋមចំពោះសត្វទន្សោងចំនួន១ ក្បាល ដែលរបួសជើងមុខខាងស្តាំធ្ងន់ធ្ងរដោយសារជាប់អន្ទាក់ ក្នុងសហគមន៍ព្រៃឈើឆក់បាស់។ អំឡុងពេលព្យាបាល មន្ត្រីបានប្រើប្រាស់ ថ្នាំសណ្តំរួចដឹកយកមកព្យាបាលមួយរយៈនៅក្នុងចម្ការពូជឈើគ្រញូង ស្ថិតនៅភូមិត្រពាំងថ្ម ឃុំឃុនរាម ស្រុកបន្ទាយ ស្រី ខេត្តសៀមរាប។

ប៉ុន្តែនៅថ្ងៃទី១៥ ខែកុម្ភៈ ឆ្នាំ២០២៤នេះ សត្វទន្សោង ត្រូវបានបាត់បង់ជីវិតដោយសាររបួសធ្ងន់ពេកមិនអាចជួយសង្គ្រោះបាន។ យ៉ាងណាមន្ត្រីជំនាញរដ្ឋបាលព្រៃឈើនៅតំបន់នោះ បានយកសពសត្វទន្សោងនោះយកទៅកប់ក្នុងរណ្ដៅរួចរាល់ហើយ៕

អត្ថបទៈ ជុន កុសល