កម្ពុជា នាំចូលជីកសិកម្មជាង ២៦លានដុល្លារ ក្នុងខែមករា កើនឡើងជិត ៤៣%

កម្ពុជា បានចំណាយទឹកប្រាក់លើការនាំចូលជីកសិកម្មពីខាងក្រៅប្រទេសប្រមាណជាង ២៦លានដុល្លារអាមេរិក នៅក្នុងខែ មករា ឆ្នាំ ២០២៤ ពោលគឺមានការកើនឡើងជិត ៤៣% បើធៀបនឹងរយៈពេលដូចគ្នាកាលពីឆ្នាំ ២០២៣ មានចំនួនទឹកប្រាក់តែជាង ១៨លានដុល្លារប៉ុណ្ណោះ។ នេះបើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា មើលឃើញថា ការនាំចូលជីកសិកម្មយ៉ាងច្រើនពីក្រៅប្រទេស គឺជាផ្នែកមួយ​នៃការហូរចេញតម្លៃបន្ថែមក្នុងសេដ្ឋកិច្ចជាតិ។ លោកបានបន្តថា «ប្រសិនបើយើងផលិតជីកសិកម្មនៅក្នុងស្រុក ចំណូលជាតិមូលនៅក្នុងប្រទេស, តែកាលណាយើង​ចំណាយថវិកា ២៦លានដុល្លារ នាំចូលជីពីក្រៅប្រទេស មានន័យថា លុយនេះហូរចេញពីស្រុកខ្មែរ តាមរយៈចំណូលជាតិ​ចេញពីវិស័យកសិកម្ម»។

លោកបណ្ឌិត គី សេរីវឌ្ឍន៍ បានបន្ថែមទៀតថា ប្រសិនបើកម្ពុជា នៅតែបន្តនាំចូលជីពីក្រៅប្រទេសច្រើន នឹងពិបាកគ្រប់គ្រងថ្លៃដើម ហើយថ្លៃដើមនេះ នឹងមានការកើនឡើងបើសិនជាប្រទេសជិតខាងចង់ធ្វើបាបកម្ពុជា នោះកសិករនឹងបាត់បង់ប្រាក់ចំណេញពីការធ្វើកសិកម្ម។

លោក យ៉ង សាំង​កុមារ រដ្ឋលេខាធិការ​ក្រសួងកសិកម្ម រុក្ខាប្រមាញ់ និង​នេសាទ ធ្លាប់បាន​លើកឡើងថា កម្ពុជា​បាន​នាំចូល​ជី​កសិកម្ម​ជាច្រើនពី​ក្រៅប្រទេស​ ដើម្បី​បំពេញតម្រូវការ​ក្នុងស្រុក ខណៈ​ការផលិត​ជី​កសិកម្ម​ក្នុងស្រុក​នៅមាន​តិចតួច​នៅឡើយ ដែល​បញ្ហា​នេះ​នឹង​ផ្តល់​ផលប៉ះពាល់​ដល់​ថ្លៃដើម​ផលិត​របស់​កសិករ​។​

​បើតាមលោក យ៉ង សាំង​កុមារ ដើម្បី​ដោះស្រាយ​បញ្ហា​នេះ ក្រសួងកសិកម្ម ធ្លាប់​ជំរុញ​និង​លើកទឹកចិត្ត​ដល់​វិស័យ​ឯកជន ឱ្យមាន​ការផលិត​ជី​កសិកម្ម​នៅក្នុង​ស្រុក ដើម្បី​ផ្គត់ផ្គង់​ដល់​កសិករ និង​បាន​ណែនាំ​ដល់​ប្រជាកសិករ​ឱ្យ​រៀន​ពី​វិធី​ផលិត​ជី​តាមបែប​ធម្មជាតិ​ដោយ​ខ្លួនឯង ដើម្បី​កាត់បន្ថយ​ការចំណាយ​ និង​ធ្វើឱ្យ​ដំណាំ​មាន​សុវត្ថិភាព​ក្នុងការ​បរិភោគ​ផងដែរ​។​

សូមបញ្ជាក់ថា នៅឆ្នាំ ២០២៣ កម្ពុជា បាននាំចូលជីបំពេញតម្រូវការវិស័យកសិកម្ម គិតជាទឹកប្រាក់ប្រមាណជាង ៣២៥លានដុល្លារ កើនឡើង ១៧,៧% បើធៀបឆ្នាំ ២០២២ មានចំនួនជាង ២៧៦លានដុល្លារអាមេរិក។ នេះបើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា៕