ព័ត៌មានជាតិ

ភ្នំពេញ មានសាលារៀនចាប់ពីកម្រិតមត្តេយ្យ ដល់ មធ្យម ជិត ២៥០ សាលា

បានផុស

១២ ខែ មុន

នៅ

ថ្ងៃសៅរ៍ ១៧ កុម្ភៈ ២០២៤

ដោយ

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានមានប្រសាសន៍ កាលពីរសៀលថ្ងៃទី ១៦ កុម្ភៈ ថា បច្ចុប្បន្ន មន្ទីរមានសាលារៀនចាប់ពីកម្រិតមត្តេយ្យសិក្សា រហូតដល់កម្រិតមធ្យមសិក្សា ចំនួន ២៤៧ សាលា ក្នុងនោះសាលាបឋមសិក្សាមានច្រើនជាងគេរហូតដល់ទៅ ១៦១ សាលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រធានមន្ទីរ បានបន្តថា ចំណោមសាលារៀន ២៤៧ សាលា ក្នុងនោះសាលាមត្តេយ្យសិក្សាមានចំនួន ១៨ សាលា សាលាបឋមសិក្សាមានចំនួន ១៦១ សាលា និងសាលាមធ្យមសិក្សាមានចំនួន ៦៨ សាលា។

លោកប្រធានមន្ទីរ បានបន្តទៀតថា «សម្រាប់ឆ្នាំ ២០២៤ នេះ មន្ទីរអប់រំរាជធានីភ្នំពេញ មិនមានគម្រោងបង្កើតសាលាថ្មីបន្ថែមទៀតទេ ពោលគឺសាលា ២៤៧ គឺគ្រប់គ្រាន់សម្រាប់សិស្សានុសិស្សរៀន ហើយអ្វីដែលត្រូវធ្វើបន្ត គឺការពង្រឹងហេដ្ឋារចនាសម្ព័ន្ធបន្ថែមនៅតាមសាលារៀនទាំងនោះឱ្យមានបរិស្ថានស្អាត ដើម្បីជួយសម្រួលដល់ការសិក្សារបស់សិស្សានុសិស្ស»។

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានជំរុញដល់គ្រឹះស្ថានសិក្សាអនុវត្តកម្មវិធីក្រៅម៉ោងសិក្សាបន្ថែម ដើម្បីពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស។

លោកឧបនាយករដ្ឋមន្ត្រី បានណែនាំថា សកម្មភាពក្រៅម៉ោងសិក្សា ត្រូវរៀបចំស្របទៅតាមតម្រូវការក្នុងការអនុវត្តកម្មវិធីសិក្សាឱ្យបានពេញលេញ និងដើម្បីពង្រឹងចំណេះដឹង វិន័យ សីលធម៌ ចរិយាធម៌ និងឥរិយាបថរបស់សិស្ស ព្រមទាំងការតម្រង់ទិសវិជ្ជាជីវៈ ដោយអនុវត្តការផ្តល់ពិន្ទុ ៨០% លើចំណេះដឹង, ១០% លើបំណិន និង ១០% លើសីលធម៌ និងចរិយាធម៌៕

អត្ថបទ ៖ សំអឿន