ព័ត៌មានជាតិ

មន្ត្រីជាន់ខ្ពស់អេដស៍ ៖ ស្រោមអនាម័យគឺជាកំផែងដ៏រឹងមាំអាចការពារមេរោគអេដស៍ មិនឱ្យឆ្លងបាន

បានផុស

១ year មុន

នៅ

ថ្ងៃសៅរ៍ ១៧ កុម្ភៈ ២០២៤

ដោយ

លោកបណ្ឌិត ឈឹម ឃិនដារ៉េត អគ្គលេខាធិការអាជ្ញាធរជាតិប្រយុទ្ធ និងជំងឺអេដស៍ បានអះអាងថា ស្រោមអនាម័យ គឺជាកំផែងដ៏រឹងមាំដែលអាចការពារមិនឱ្យមេរោគអេដស៍ឆ្លងចូលក្នុងខ្លួនបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងទិវាស្រោមអនាម័យអន្តរជាតិឆ្នាំ ២០២៤ ដែលរៀបចំដោយអង្គការមូលនិធិថែទាំសុខភាពអ្នកជំងឺអេដស៍កម្ពុជា កាលពីថ្ងៃទី ១៦ ខែកុម្ភៈ នៅសាកលវិទ្យាល័យបៀលប្រាយ ខេត្តបាត់ដំបង ដោយមានការចូលរួមពីលោកស្រី សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា លោក ទីន សារ៉ាវុធ អភិបាលរងខេត្តបាត់ដំបង លោកបណ្ឌិត ឈឹម ឃិនដារ៉េត បានបន្តថា រាជរដ្ឋាភិបាល តែងតែគិតគូរជាចម្បងលើសុខភាពរបស់ប្រជាពលរដ្ឋ និងការអប់រំ នៅក្នុងគ្រប់វិស័យទាំងអស់ ហើយរហូតមកដល់ពេលនេះ រាជរដ្ឋាភិបាល បានដាក់បញ្ចូលនៅក្នុងយុទ្ធសាស្ត្របញ្ចកោណ ដែលជាអាទិភាពធំជាងគេមួយទៀត ស្ថិតក្នុងមុំទីមួយ គឺការអភិវឌ្ឍធនធានមនុស្ស ដើម្បីសម្រេចចក្ខុវិស័យរបស់យើង ២០៣០, ២០៥០។

លោកបណ្ឌិត ឈឹម ឃិនដារ៉េត ក៏បានចាត់ទុកទិវាមួយនេះ ដើម្បីរម្លឹកដល់អ្នកដែលប្រឈមជាមួយនឹងមេរោគអេដស៍ និងសម្រាប់បម្រើឱ្យសុខភាពសាធារណៈទូទៅ ក៏ដូចជាការពារជំងឺឆ្លង និងជាទិវាមួយមានសារៈសំខាន់បំផុតក្នុងការប្រយុទ្ធប្រឆាំងជំងឺអេដស៍ មេរោគអេដស៍ នៅប្រទេសកម្ពុជា ក៏ដូចជាសកលលោកផងដែរ។

លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីអង្គការមូលនិធិថែទាំសុខភាពអ្នកជំងឺអេដស៍ បានឱ្យដឹងទៀតថា យោងតាមអង្គការសុខភាពពិភពលោក មនុស្សជាង ១ លាននាក់ នៅទូទាំងពិភពលោក បានឆ្លងជំងឺកាមរោគជារៀងរាល់ថ្ងៃ ហើយការឆ្លងមេរោគអេដស៍ថ្មីចំនួន ១១៧ លាននាក់ ចាប់តាំងពីឆ្នាំ ១៩៩០ ដោយសារតែស្រោមអនាម័យដែលអាចជួយឱ្យចៀសផុតពីការឆ្លងជំងឺកាមរោគ និងមេរោគអេដស៍។ នេះជាមូលហេតុដែលត្រូវរៀបចំក្នុងទិវាស្រោមអនាម័យអន្តរជាតិ និងលើសពីនេះ ពិភពលោកត្រូវតែចងចាំថា ស្រោមអនាម័យមានសុវត្ថិភាព និងសិចស៊ី និងចាំបាច់ក្នុងការបញ្ចប់មេរោគអេដស៍/ជំងឺអេដស៍។

លោកវេជ្ជបណ្ឌិត ឈឹម សារ៉ាត់ បានឱ្យដឹងទៀតថា ទិវាស្រោមអនាម័យអន្តរជាតិឆ្នាំ ២០២៤ នេះ យើងជំរុញឱ្យមនុស្សគ្រប់គ្នានៅទូទាំងពិភពលោកចងចាំថា ស្រោមអនាម័យជួយសង្គ្រោះជីវិតមនុស្ស ហើយនៅតែជាជម្រើសដ៏ល្អបំផុតសម្រាប់ការពារមេរោគអេដស៍ ជំងឺឆ្លងតាមការរួមភេទផ្សេងទៀត និងការមានផ្ទៃពោះដោយមិនបានគ្រោងទុក។

គួរបញ្ជាក់ថា អង្គការមូលនិធិថែទាំសុខភាពអ្នកជំងឺអេដស៍ គឺជាអង្គការពិភពលោកដ៏ធំបំផុតដែលបាននិងកំពុងផ្តល់សេវាថែទាំព្យាបាលដោយមិនគិតពីលទ្ធភាព នៃការបង់ប្រាក់ដល់អតិថិជនជាង ១.៩ លាននាក់ ក្នុង ៤៦ ប្រទេស ជុំវិញពិភពលោក មានដូចជា សហរដ្ឋអាមេរិក អាហ្វ្រិក អាមេរិកឡាទីន ការាបៀន តំបន់អាស៊ី ប៉ាស៊ីហ្វិក និងអឺរ៉ុប៕

អត្ថបទ ៖ សំអឿន