ព័ត៌មានជាតិ

យកផ្លូវសាធារណៈធ្វើជាកន្លែងចិញ្ចឹមមាន់ជល់ត្រូវអាជ្ញាធរចុះណែនាំ

បានផុស

៤ years មុន

នៅ

ថ្ងៃពុធ ១៧ កុម្ភៈ ២០២១

ដោយ

អាជ្ញាធរសង្កាត់ច្បារអំពៅទី២កាលពីថ្ងៃទី១៧ ខែកុម្ភៈនេះ បានចុះណែនាំបងប្អូនប្រជាពលរដ្ឋរស់នៅភូមិដើមស្លែងឲ្យបញ្ឈប់យកមាន់ដាក់ក្នុងទ្រុងមកដាក់លើផ្លូវសាធារណៈបង្កឲ្យប៉ះពាល់ដល់អ្នកធ្វើដំណើជារៀងរាល់ថ្ងៃ។

យោងតាមប្រសាសន៍លោក យ៉ិន វុធ ចៅសង្កាត់ច្បារអំពៅទី២ បានប្រាប់កម្ពុជាថ្មីថា កន្លងមកលោកបានទទួលព័ត៌មានពីប្រជាពលរដ្ឋរស់នៅភូមិដើមស្លែងសង្កាត់ច្បារអំពៅទី២ ខណ្ឌច្បារអំពៅរាជធានីភ្នំពេញ ពីសកម្មភាពម្ចាស់មាន់យកមាន់ជល់របស់ខ្លួនមកក្រុងក្នុងទ្រុងដាក់លើផ្លូវសាធារណៈ បង្កឲ្យប៉ះពាល់ដល់ការធ្វើដំណើររបស់ពលរដ្ឋ។ ចំណែកម្ចាស់មាន់ជល់មិនស្តាប់តាមការសំណូមពរអ្នកដំណើរឡើយ គឺនៅបន្តដាក់មាន់លើផ្លូវទើបលោកចៅសង្កាត់ចុះទៅពិនិត្យដល់ទីតាំងចិញ្ចឹមមាន់នេះដោយផ្ទាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកយ៉ិន វុធ បន្តថា ពេលទៅដល់ គឺពិតជាមានដាក់សត្វមាន់ចិញ្ចឹមក្នុងទ្រុងពិតប្រាកដមែន។ហើយក្នុងនោះលោកចៅសង្កាត់បានធ្វើការណែនាំ និងបញ្ឈប់ឲ្យយកមាន់មកដាក់ចិញ្ចឹមលើផ្លូវប៉ះពាល់ដល់ការធ្វើដំណើរ។ ម្យ៉ាងទៀតអាជ្ញាធរបានសាងសង់ផ្លូវគឺសម្រាប់ឲ្យបងប្អូនប្រជាពលរដ្ឋបានធ្វើដំណើរ ពុំមែនសម្រាប់ដាក់កន្លែងចិញ្ចឹមមាន់នោះទេ។

លោកចៅសង្កាត់ក៏បានសុំការអភ័យទោសពីប្រជាពលរដ្ឋខណៈដែលលោកពុំបានដឹងពីសកម្មភាពយកមាន់មកចិញ្ចឹមដាក់លើផ្លូវបែបនេះ។ ហើយក៏ពុំអាចមានជាលើកទី២នោះដែរ៕

អត្ថបទ ៖ នរា