សម្តេច ម៉ែន សំអន ជំរុញឲ្យសមាជិក-សមាជិកាបក្សទាំងអស់ ត្រូវអនុវត្តនូវគោលការណ៍សំខាន់ៗរបស់គណបក្ស

សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានជំរុញសមាជិក-សមាជិកាបក្សទាំងអស់ ត្រូវអនុវត្តនូវគោលការណ៍សំខាន់ៗ របស់គណបក្សប្រជាជនកម្ពុជា ដើម្បីទទួលជោគជ័យ ក្នុងការបោះឆ្នោតព្រឹទ្ធសភា អាណត្តិទី ៥នេះ។

សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះខណៈជួបសំណេះសំណាល ជាមួយសមាជិក- សមាជិកា នៃអង្គបោះឆ្នោតព្រឹទ្ធសភា អាណត្តិទី ៥ មកពី ១០ឃុំ នៃស្រុករំដួល ខេត្តស្វាយរៀង នៅស្នាក់ការគណបក្សប្រជាជនស្រុករំដួល នាព្រឹកថ្ងៃទី ១៩ ខែកុម្ភៈ ឆ្នាំ ២០២៤នេះ។

ក្នុងពិធីជួបសំណេះសំណាលនេះ សម្តេចកិត្តិសង្គហបណ្ឌិត បានផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន ប្រធានគណបក្សប្រជាជនកម្ពុជា សម្តេចពញាចក្រី ហេង សំរិន ប្រធានកិត្តិយសគណបក្ស និងសម្តេចមហាបវរធិបតី ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រីនៃកម្ពុជា សម្តេចអនុប្រធានគណបក្ស និងបានកោតសសើរវាយតម្លៃខ្ពស់ចំពោះសមាជិក-សមាជិកា នៃក្រុមប្រឹក្សាឃុំ-សង្កាត់ក្នុងតំណែង នៅទូទាំងស្រុករំដួល ក៏ដូចជាក្នុងខេត្តស្វាយរៀង ដែលបានយកអស់កម្លាំងកាយកម្លាំងចិត្ត ក្នុងការបំពេញភារកិច្ចបម្រើប្រជាជន។

សម្តេចកិត្តិសង្គហបណ្ឌិត ក៏បានសំណូមពរដល់សមាជិក-សមាជិកា នៃអង្គបោះឆ្នោតទាំងអស់ ត្រូវអនុវត្តឲ្យបានសម្រេចនូវសេចក្តីកំណត់ ស្តីពី ផែនការរួមឆ្ពោះទៅកាន់ការបោះឆ្នោតព្រឹទ្ធសភា អាណត្តិទី ៥ ឆ្នាំ ២០២៤ ត្រូវថែទាំសុខភាពឲ្យបានល្អ និងបោះឆ្នោតជូនគណបក្សប្រជាជន។ ជាពិសេស សមាជិក-សមាជិកាគណបក្សគ្រប់ថ្នាក់ ត្រូវចូលរួមផ្សព្វផ្សាយឲ្យបានទូលំទូលាយនូវសេចក្តីថ្លែងការណ៍លេខ ០០២ គជប ចុះថ្ងៃទី ១៥ ខែកុម្ភៈ ឆ្នាំ ២០២៤ របស់គណៈកម្មការជាតិ​រៀបចំ​ការ​បោះឆ្នោត និងសេចក្តី​ប្រកាស​ព័ត៌មានលេខ ០០៤ សប្រក ចុះថ្ងៃទី ១៥ ខែកុម្ភៈ ឆ្នាំ ២០២៤ របស់​ក្រសួងមហាផ្ទៃ​ ដែលជាការឆ្លើយតបនឹងសកម្មភាពបង្ខិតបង្ខំគំរាមកំហែង ដល់អ្នកបោះឆ្នោតរបស់គណបក្សភ្លើងទៀន ដើម្បី​សំដៅការពារសិទ្ធនៃអង្គបោះឆ្នោត ដែល​មាន​ចែងនៅ​ក្នុង​រដ្ឋធម្មនុញ្ញ នៃព្រះរាជាណាចក្រកម្ពុជា៕

អត្ថបទ៖ វិមាន