ស្នងការខេត្តកំពត ស្នើឱ្យពលរដ្ឋប្រុងប្រយ័ត្នខ្ពស់ករណីបោកប្រាស់តាមប្រព័ន្ធអនឡាញ

លោក ម៉ៅ ច័ន្ធមធុរិទ្ធ ស្នងការនគរបាលខេត្តកំពត បានអំពាវនាវដល់ប្រជាពលរូបគ្រប់រូបឱ្យមានការប្រុងប្រយ័ត្នខ្ពស់ចំពោះការបោកប្រាស់តាមរូបភាពផ្សេងៗនៅលើបណ្តាញសង្គម ជាពិសេស ករណីអ្នកដែលទាក់ទងមកជាជនបរទេសមានបំណងផ្តល់ទ្រព្យសម្បត្តិឱ្យ និងតម្រូវឱ្យមានការបង់ប្រាក់មុនសម្រាប់សេវាកម្មនានា។ លោកថា ទាំងនេះ សុទ្ធតែជាការបោកប្រាស់។

លោក អំពាវនាវបែបនេះ នៅលើទំព័រហ្វេសប៊ុកស្នងការដ្ឋាននគរបាលខេត្តកំពត នៅថ្ងៃទី១៩ ខែកុម្ភៈ ឆ្នាំ២០២៤នេះ។ លោក ម៉ៅ ច័ន្ធមធុរិទ្ធ លើកឡើងថា ករណីបោកប្រាស់តាមបណ្តាញសង្គមហ្វេសប៊ុកពាក់ព័ន្ធអ្នកដែលឆាតមក គឺជាជនបរទេសរស់នៅតែម្នាក់ឯង និងមានជំងឺផ្សេងៗ ឬក៏ប្តីស្លាប់ចោលហើយមិនអាចរស់បានយូរតទៅទៀត និងនៅសល់ប្រាក់ច្រើនមិនដឹងយកទៅឱ្យនរណា ហើយចង់ឱ្យលុយនោះមក គឺជាការបោកប្រាស់សុទ្ធសាធ គ្មាននរណាម្នាក់យកលុយរាប់ម៉ឺនដុល្លារឱ្យទទេៗឡើយ។  

លោកស្នងការបញ្ជាក់បន្ថែមថា ករណីនេះ គឹសុទ្ធតែមានបក្សពួករៀបចំបោកប្រាស់ឱ្យចាញ់កលល្បិច ហើយធ្វើជាបង្ហាញកញ្ចប់លុយ ឬ វ៉ាលីដាក់លុយ ដើម្បីឱ្យទុកចិត្ត។ បន្ទាប់មក ពួកឆបោកនោះ នឹងសុំលេខទូរសព្ទ ដើម្បីទំនាក់ទំនង ប៉ុន្មានថ្ងៃក្រោយមកក៏មានអ្នកក្លែងជាភ្នាក់ងារសមត្ថកិច្ចនៅព្រលានយន្តហោះណាមួយនៅកម្ពុជា រួចថា មានគេផ្ញើកញ្ចប់អីវ៉ាន់ដែលមានភិនភាគដូចរូបដែលជនឆបោកបង្ហាញនៅពេលដំបូង ហើយបង្គាប់ឱ្យបង់ប្រាក់ ដើម្បីទទួលយកកញ្ចប់អីវ៉ាន់ដែលគេផ្ញើពីបរទេសនោះ។ លោក ម៉ៅ ច័ន្ធមធុរិទ្ធ សង្កត់ធ្ងន់ឱ្យប្រជាពលរដ្ឋប្រុងប្រយ័ត្នចំពោះករណីខាងលើ និងចងចាំករណីនេះទុក ព្រោះជាការបោកប្រាស់សុទ្ធសាធ ដើម្បីចៀសវាងមានពលរដ្ឋមួយចំនួនរងការចាញ់បោក។

តាមការសង្កេត បច្ចុប្បន្ន បណ្តាញសង្គម មានការពេញនិយមខ្លាំងទូទាំងពិភពលោក និងទាំងនៅកម្ពុជា ដែលនាំទាំងភាពវិជ្ជមាន និងអវិជ្ជមានដល់សង្គមខ្មែរ។ ជាមួយគ្នានេះ ការបោកប្រាស់តាមបណ្តាញសង្គម ក៏មានច្រើនករណីដូចគ្នាក្នុងរូបភាពផ្សេងៗ ដូច្នេះ ប្រជាពលរដ្ឋគួរមានការប្រុងប្រយ័ត្នខ្ពស់ កុំឆាប់ជឿអ្នកដទៃ ត្រូវមានការពិរណាឱ្យបានគ្រប់ជ្រុងជ្រោយ ជាពិសេស កុំទុកចិត្តមនុស្សដែលខ្លួនមិនស្គាល់ឱ្យសោះ៕