៥ឆ្នាំចុងក្រោយ កម្ពុជា បណ្តុះបណ្តាលធនធានមនុស្ស​ក្នុងវិស័យអាកាសចរណ៍​បានចំនួនជាង ១៣០០នាក់

គិតត្រឹមរយៈពេល ៥ឆ្នាំចុងក្រោយ ពោលគឺពីឆ្នាំ ២០១៩-២០២៣ កម្ពុជា បានបណ្តុះបណ្តាលធនធានមនុស្សលើជំនាញអាកាសចរណ៍ស៊ីវិលទាំងក្នុង និងក្រៅប្រទេសបានប្រមាណ ១៣៨០នាក់។ នេះបើយោងតាមរបាយការណ៍ធាតុចូលរបស់រដ្ឋលេខាធិការដ្ឋានអាកាសចរណ៍ស៊ីវិលកម្ពុជា។

តាមរយៈតារាងរបាយការណ៍ដដែលបានបង្ហាញថា នៅឆ្នាំ ២០១៩ លទ្ធផលនៃការបណ្តុះបណ្តាលធនធានមនុស្សនៅក្នុងប្រទេសបានចំនួន ៥០៦នាក់ និងក្រៅប្រទេសចំនួន ៩៧នាក់ សរុបចំនួន ៦០៣នាក់។

សម្រាប់ឆ្នាំ ២០២០ លទ្ធផលនៃការបណ្តុះបណ្តាលធនធានមនុស្សនៅក្នុងប្រទេសបានចំនួន ២៤៤នាក់ និងក្រៅប្រទេសចំនួន ១០នាក់ សរុបចំនួន ២៥៤នាក់។ ចំណែកនៅឆ្នាំ ២០២១ លទ្ធផលនៃការបណ្តុះបណ្តាលធនធានមនុស្សនៅក្នុងប្រទេសបានចំនួន ១៤៨នាក់ និងក្រៅប្រទេសចំនួន ៣៨នាក់ សរុបចំនួន ១៨៦នាក់។

ដោយឡែកនៅឆ្នាំ ២០២២ លទ្ធផលនៃការបណ្តុះបណ្តាលធនធានមនុស្សនៅក្នុងប្រទេសបានចំនួន ១៨៨នាក់ និងក្រៅប្រទេសចំនួន ៤៧នាក់ សរុបចំនួន ២២៥នាក់។ ប្រភពដដែលបញ្ជាក់ទៀតថា នៅឆ្នាំ ២០២៣ លទ្ធផលនៃការបណ្តុះបណ្តាលធនធានមនុស្សនៅក្នុងប្រទេសបានចំនួន ៨២នាក់ និងក្រៅប្រទេស​ចំនួន ៣០នាក់ សរុបចំនួន ១១២នាក់។

បើតាមរបាយការណ៍បានគូសបញ្ជាក់ថា មន្រ្តីរាជការទាំងអស់ នៃរដ្ឋលេខធិការដ្ឋានអាកាសចរណ៍ស៊ីវិល ត្រូវបានបណ្តុះបណ្តាល និងបំពាក់បំប៉ន​ជំនាញជាមូលដ្ឋាន ជំនាញមធ្យម និងជំនាញជាន់ខ្ពស់ រួមទាំងរំលឹកឡើងវិញ លើជំនាញជាក់លាក់ ដើម្បីធានាសុវត្ថិភាព សន្តិសុខ ដែលឆ្លើយតបបានមួយចំនួនធំ ទៅនឹងលក្ខខណ្ឌតម្រូវរបស់ជំនាញ និងអង្គការអាកាសចរណ៍ស៊ីវិលអន្តរជាតិ ដោយក្នុងនោះមាន​មន្រ្តីអធិការ​កិច្ចក្នុងវិស័យអាកាសចរណ៍ស៊ីវិលចំនួន ៥១នាក់។

សូមបញ្ជាក់ថា វិស័យអាកាសចរណ៍កម្ពុជា បាននិងកំពុងអភិវឌ្ឍរីកចម្រើន ខណ:ដែលរាជរដ្ឋាភិបាលបន្តពង្រីកការសាងសង់អាកាសយានដ្ឋាន​អន្តរជាតិជា​បន្តបន្ទាប់ ដើម្បីបង្កើតភាពប្រកួតប្រជែង លើកកម្ពស់ការតភ្ជាប់ និងបង្កើនប្រសិទ្ធភាពនៃវិស័យដឹកជញ្ជូន ឡូជីស្ទីក ជាពិសេសទាក់ទាញភ្ញៀវទេសចរ និងជំរុញកំណើនសេដ្ឋកិច្ចជាតិ៕