ព័ត៌មានជាតិ

កោះស្ដេច នឹងប្រឈមការខ្វះទឹកស្អាតប្រើប្រាស់នៅរដូវប្រាំង

បានផុស

១០ ខែ មុន

នៅ

ថ្ងៃពុធ ២១ កុម្ភៈ ២០២៤

ដោយ

ប្រភពទឹកសាបដែលចែកចាយទឹកស្អាតជូនប្រជាពលរដ្ឋរស់នៅលើកោះស្តេច នឹងប្រឈមការកង្វះទឹកប្រើប្រាស់ប្រចាំថ្ងៃនារដូវប្រាំងនេះ ខណៈបច្ចុប្បន្នអាជ្ញាធរកំពុងរិះរកដំណោះស្រាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សាយ ង៉ែត អភិបាលរងស្រុកគិរីសាគរ បានឱ្យដឹងនៅរសៀលថ្ងៃទី ២១ ខែកុម្ភៈ ឆ្នាំ ២០២៤ នេះថា ប្រភពទឹកសាបចែកចាយទឹកទៅកោះស្តេច មានទីតាំងចំណុចអន្លង់ត្រី ស្ថិតនៅភូមិព្រែកស្មាច់ មានសភាពផ្តើមស្រក និងពណ៌ល្អក់ដូចកាហ្វេទឹកដោះគោ ដែលជាសញ្ញាប្រឈមនឹងការកង្វះទឹកប្រើប្រាស់ទៅថ្ងៃមុខ ពិសេសរដូវប្រាំងនេះតែម្ដង។

លោក សាយ ង៉ែត គូសបញ្ជាក់ទៀតថា រដ្ឋបាលស្រុក កំពុងស្នើសុំមន្ទីរអង្គភាពជំនាញ ដើម្បីត្រួតពិនិត្យផ្នែកបច្ចេកទេសធ្វើយ៉ាងអាចរក្សាទឹកទុកបានល្អប្រសើរ មិនខ្វះ សម្រាប់រដូវប្រាំងនេះ។ បើធៀបនឹងប្រភពទឹកសាបនៅឃុំភ្ញីមាស គឺមានទឹកគ្រប់គ្រាន់សម្រាប់ស្តុកទុកជូនប្រជាពលរដ្ឋប្រើប្រាស់តាមតម្រូវការ មិនមានបញ្ហាប្រឈមនោះទេ។ ជាក់ស្ដែង ប្រជាពលរដ្ឋ ក៏បានយកមធ្យោបាយផ្ទាល់ខ្លួនមកបូមទុកប្រើប្រាស់ដែរ។

បញ្ហាទឹកស្អាតនៅលើកោះស្តេច ក្នុងវេទិកាសាធារណៈរបស់រដ្ឋបាលខេត្ត ប្រជាពលរដ្ឋ និងអាជីវករ បានស្នើសុំជាច្រើនលើកច្រើនសាមកហើយដែរចំពោះការខ្វះទឹកប្រើប្រាស់រដូវប្រាំង។ ក្នុងនោះ រដ្ឋបាលខេត្ត ចាត់ឱ្យមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ខេត្តកោះកុង រៀបចំបច្ចេកទេសនានា ស្វែងរកដំណោះស្រាយមួយនេះជូនប្រជាពលរដ្ឋ៕

អត្ថបទ ៖ សិរីវឌ្ឍនៈ