កសិករ៖ ទិន្នផលស្វាយចន្ទី​ធ្លាក់ចុះ​ ខណៈតម្លៃក៏ទាប នាដើមរដូវប្រមូលផលឆ្នាំនេះ

កសិករដាំស្វាយចន្ទីបានឱ្យដឹងថា ទិន្នផលស្វាយចន្ទីនៅឆ្នាំ ២០២៤នេះ ទទួលបានតិចជាងឆ្នាំមុន ​ដោយសារបញ្ហាអាកាសធាតុ ខណៈតម្លៃក៏ទាប។

លោក វ៉ាន់ ពេជ្រ កសិករនៅភូមិជាំផ្កា ស្រុកសណ្ដាន់ ខេត្តកំពង់ធំបានឱ្យដឹងថា លោកដាំស្វាយចន្ទីចំនួន ៤ ហិកតា ដោយក្នុង១ ហិកតាទទួលបានផលប្រមាណ ២.៥ តោន ពោលគឺទិន្នផលតិចជាងឆ្នាំមុនៗ ដែលបានជាង ៣ តោនក្នុង១ហិកតា។

សម្រាប់តម្លៃស្វាយចន្ទីបច្ចុប្បន្នលោកលក់បាន ៥.០០០-៥.១០០ រៀល/គ.ក ខណៈតម្លៃនេះនៅទាប ប៉ុន្តែក៏អាចផ្ដល់ផលឱ្យលោកបានចំណេញតិចតូច ដោយសារការចំណាយទៅលើ ជី ប្រេង ថ្នាំ និងកម្លាំង​ពលកម្ម។

លោក វ៉ាន់ ពេជ្រ បញ្ជាក់ថា ក្នុងមួយហិកតា លោកអាចចំណេញថវិកាប្រមាណ ១០ លានរៀល ខណៈក៏មានកសិករមួយចំនួនក៏ខាតបង់ផងដែរ។

សមាគមស្វាយចន្ទី​កម្ពុជាកាលពីពេលថ្មីៗនេះ បានទម្លាក់​ការព្យា​ករណ៍ទិន្នផលស្វាយចន្ទីលើស ១០ ភាគរយ នៅឆ្នាំ ២០២៤ ធៀបឆ្នាំ ២០២៣ ដោយសារតែបាតុភូតអែលនីញ៉ូ ធ្វើឱ្យប៉ះពាល់ដល់ដំណាំស្វាយចន្ទី ដែលធ្វើឱ្យគាំងក្ដឹប និងខូចផ្កា ​និងការកកើត​សត្វល្អិតបំផ្លាញច្រើន។

បើយោងតាមរបាយការណ៍សមាគមស្វាយចន្ទីកម្ពុជាបង្ហាញថា នៅឆ្នាំ ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារ​អន្តជាតិចំនួន ៦៥ ម៉ឺន ៦ ពាន់តោន ថយចុះ ៧.៦% គិតជាទឹកប្រាក់ចំនួន ៨៣៧ លានដុល្លារ បើប្រៀបធៀបឆ្នាំ ២០២២។

ការនាំចេញស្វាយចន្ទីរមានការធ្លាក់ចុះ ដោយសារការប្រែប្រួលអាកាសធាតុ ធ្វើឱ្យកសិករកាប់ស្វាយចន្ទី​ចោលកន្លងមក រយៈពេល ៣ ឆ្នាំចុងក្រោយ សមាគមរកឃើញស្វាយចន្ទីតែ ៧០ ម៉ឺនហិកតា ខណៈដំណាំដែលឱ្យផលមានតែ ៦៤ ម៉ឺនហិកតា ហើយដំណាំដែលដាំថ្មីមាន ៦ ម៉ឺនហិកតា ដូច្នេះធ្វើឱ្យទិន្នផលស្វាយចន្ទីធ្លាក់ចុះ៕

អត្ថបទ៖ ឡេង ដេត