ព័ត៌មានជាតិ

ទូតកូរ៉េអះអាងថា ស្ពានឆ្លងទន្លេទៅអរិយក្សត្ររំពឹងបើកការដ្ឋានសាងសង់នៅដើមឆ្នាំ២០២៥

បានផុស

១១ ខែ មុន

នៅ

ថ្ងៃពុធ ២១ កុម្ភៈ ២០២៤

ដោយ

ថ្លែងនៅចំពោះមុខរដ្ឋមន្ត្រីក្រសួងសាធារណការ និងដឹកជញ្ជូន ឯកអគ្គរដ្ឋទូតវិសាមញ្ញនិងពេញសមត្ថភាព នៃសាធារណរដ្ឋកូរ៉េ ប្រចាំនៅព្រះរាជាណាចក្រកម្ពុជាបានបង្ហាញពីវឌ្ឍនភាពនៃគម្រោងសាងសង់ស្ពានឆ្លងទន្លេទៅអរិយក្សត្រ ដែលរំពឹងនឹងអាចបើកការដ្ឋានសាងសង់នៅដើមឆ្នាំ ២០២៥។

លោក ផាក ជុងវ៉ុក ឯកអគ្គរដ្ឋទូតវិសាមញ្ញនិងពេញសមត្ថភាពនៃសាធារណរដ្ឋកូរ៉េប្រចាំនៅព្រះរាជាណាចក្រកម្ពុជាបានបញ្ជាក់ថា គម្រោងសាងសង់ស្ពានមិត្តភាពកម្ពុជា-កូរ៉េ (ផ្សារចាស់-ជ្រោយចង្វារ-អរិយក្សត្រ) កំពុងអនុវត្តតាមនីតិវិធីជាបន្តបន្ទាប់ ហើយរំពឹងនឹងអាចបើកការដ្ឋានសាងសង់បាននាអំឡុងដើមឆ្នាំ២០២៥ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ពានមិត្តភាពកម្ពុជា-កូរ៉េ ដែលមានតម្លៃជិត ៣០០ លានដុល្លារអាមេរិក សាងសង់តភ្ជាប់ពីចំណុចផ្សាររាត្រីឆ្ពោះទៅតំបន់អរិយក្សត្រត្រូវបានចុះហត្ថលេខារវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋកូរ៉េកាលពីថ្ងៃទី០៩ ខែធ្នូ ឆ្នាំ២០២២ កន្លងទៅ។

លោក ផន រីម មន្រ្តីអ្នកនាំពាក្យក្រសួងសាធារណការនិងដឹកជញ្ជូនបានបញ្ជាក់មកកាន់ «កម្ពុជាថ្មី» កាលពីថ្ងៃទី ២២ ខែមករាថា គម្រោងសាងសង់ស្ពានមិត្តភាពកម្ពុជា-កូរ៉េ ភ្ជាប់ពីចំណុចផ្សាររាត្រីឆ្ពោះទៅតំបន់អរិយក្សត្រនឹងបញ្ចប់នីតិវិធីនៅអំឡុងត្រីមាសទី ១ ឆ្នាំ២០២៤។

បើតាមមន្រ្តីអ្នកនាំពាក្យរូបនេះ ក្រោយបញ្ចប់នីតិវិធីនឹងឈានទៅជ្រើសរើសក្រុមហ៊ុនសាងសង់ដែលនឹងធ្វើឡើងនៅចុងឆ្នាំ ២០២៤។

គេមើលឃើញថាតាមរយៈគម្រោងស្ពានតម្លៃរយលានដុល្លារនេះ នឹងជួយជំរុញឲ្យតម្លៃអចលនទ្រព្យនៅតំបន់ត្រើយម្ខាងនៃដងទន្លេមេគង្គជាពិសេសតំបន់អរិយក្សត្រឲ្យហក់ឡើង ខណៈទីនោះបច្ចុប្បន្នកំពុងមានការអភិវឌ្ឍលើហេដ្ឋារចនាសម្ព័ន្ធរួមទាំងគម្រោងសាងសង់បុរីជាច្រើន ដែលអនាគតនឹងប្រែក្លាយទៅជាទីក្រុងរណបថ្មីមួយទៀតនៅរាជធានីភ្នំពេញ៕

Related Topics:ហេដ្ឋារចនាសម្ព័ន្ធសំខាន់ៗ