ក្រុមយុវជនសង្គមស៊ីវិល គាំទ្រចំពោះវិធានការរបស់សម្តេចធិបតី ក្នុងការប្រយុទ្ធប្រឆាំងគ្រឿង ញៀន

សមាគមយុវជនខ្មែរមហានគរ ក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធ បានប្រកាសគាំទ្រយ៉ាងពេញទំហឹងចំពោះវិធានការដ៏ម៉ឺងម៉ាត់របស់សម្តេចធិបតី ហ៊ុន ម៉ាណែត ក្នុងការប្រយុទ្ធប្រឆាំងគ្រឿងញៀន តាមក្រសួងស្ថាប័ន និងរដ្ឋបាលថ្នាក់ក្រោមជាតិ ដោយត្រូវបណ្តេញចេញពីក្របខណ្ឌ បើរកឃើញថា មានពាក់ព័ន្ធនឹងគ្រឿងញៀន។

ញត្តិគាំទ្រ នៅថ្ងៃទី២១ ខែកុម្ភៈ ឆ្នាំ២០២៤ សមាគមយុវជនខ្មែរមហានគរ ក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធ បានលើកឡើងថា វិធានការ​នេះ ជា​ការ​ពង្រឹង​ប្រព័ន្ធ​ការងារ និង​កែលម្អ​មន្ត្រីរាជការ គ្រប់​ក្រសួង​ស្ថាប័ន និង​រដ្ឋបាល​ថ្នាក់ក្រោម​ជាតិ ឱ្យ​កាន់តែ​ល្អ​ប្រសើរ​ឡើង​ថែមទៀត ដែល​រួមចំណែក​យ៉ាងសំខាន់​ក្នុងការ​លុបបំបាត់​បញ្ហា​គ្រឿង ញៀន​នៅ​ក្នុង​ប្រទេស ជំរុញ​ភាព​ស្អាតស្អំ សន្តិសុខ​សង្គម សុខដុមរមនា និង​ការអភិវឌ្ឍ​នៅក្នុង​សង្គម ធ្វើឱ្យ​ប្រទេស​​ឈានទៅ​សម្រេច​គោលដៅ ក្លាយជា​ប្រទេស​មាន​ចំណូល​មធ្យម​កម្រិត​ខ្ពស់​នៅ​ឆ្នាំ​២០៣០ និង​ជា​ប្រទេស​មាន​ចំណូល​ខ្ពស់​នៅ​ឆ្នាំ​២០៥០​។

ចាប់​តាំង​ពី​ចូលកាន់​តំណែង​ជា​នាយករដ្ឋមន្ត្រី សម្តេច​ធិបតី ដែល​ជា​យុវជន​បន្តវេន បាន​ខិតខំ​បំពេញការងារ​មិនដែល​នឿយហត់​ទាំង​យប់​ទាំង​ថ្ងៃ ដើម្បី​បម្រើ​ផលប្រយោជន៍​ប្រជាពលរដ្ឋ និង​ប្រទេសជាតិ តាមរយៈ​ការ​ដាក់ចេញ​គោលនយោបាយ​បញ្ច​កោណ ដំណាក់កាល​ទី​១ ដែលក្នុងនោះ ​កម្មវិធី​អាទិភាព​៦​ចំណុច ត្រូវ​បាន​ដាក់​ឱ្យអនុវត្ត​ភ្លាមៗ សំដៅ​ជួយ​ប្រជាពលរដ្ឋ​ដែល​រងគ្រោះ​ពិតប្រាកដ។

ញត្តិដដែលនេះ បានគូសបញ្ជាក់ថា សម្តេចធិបតី ​បាន​ពង្រឹង​គ្រប់​ក្រសួង​-​ស្ថាប័ន និង​បង្កើត​សមិទ្ធផល​ធំៗ​ជា​បន្តបន្ទាប់​។ វិធានការ​ជាច្រើន​ដែល​ដាក់ចេញ​ដោយសម្តេច ត្រូវបាន​សាទរ​យ៉ាងខ្លាំង​ពី​ប្រជាពលរដ្ឋ មានដូចជា ការបណ្តេញ​កងកម្លាំង​ប្រដាប់អាវុធ​ណា ដែល​ប្រើប្រាស់​គ្រឿងញៀន​ចេញពី​ក្របខណ្ឌ វិធានការ​ចំពោះ​អ្នកបើកបរ​បង្ក​គ្រោះថ្នាក់​ចរាចរណ៍ ហើយ​គេចវេស ​ជាដើម​។

សមាគមយុវជនខ្មែរមហានគរ ក្រុមយុវជនសង្គមស៊ីវិល និងក្រុមសេដ្ឋកិច្ចក្រៅប្រព័ន្ធ បានបង្ហាញការ​ពេញចិត្ត​ និង​បានប្រកាស​បន្ត​គាំទ្រ​ ​ចំពោះ​ការដឹកនាំ​ប្រកបដោយ​គតិបណ្ឌិត​រប​ស់សម្តេច​ធិបតី ហ៊ុន ម៉ា​ណែ​ត ស្របតាម​មាគ៌ា​សម្តេច​តេ​ជោ ហ៊ុន សែន អតីត​នាយករដ្ឋមន្ត្រី ដែល​ធ្វើឱ្យ​​កម្ពុជា បោះជំហាន​ទៅមុខ​ប្រកបដោយ​ទំនុកចិត្ត ជាមួយនឹង​សន្តិភាព ស្ថិរភាព និង​ការអភិវឌ្ឍ​ជា​បន្តបន្ទាប់​លើ​គ្រប់​វិស័យ​៕