ក្រុមហ៊ុន​ចិន​សន្យា​​ជំរុញអភិវឌ្ឍ​ប្រព័ន្ធដឹកជញ្ជូនរថភ្លើងធុនស្រាលនៅកម្ពុជា​ឲ្យ​លេចរូបរាង

ថ្នាក់ដឹកនាំ​ក្រុមហ៊ុន China Metro Group បាន​បង្ហាញសុឆន្ទៈនិងការប្តេជ្ញាចិត្តក្នុង​ការ​ជំរុញឱ្យប្រព័ន្ធដឹកជញ្ជូនដោយ​រថភ្លើងធុនស្រាល (LRT) នៅកម្ពុជាឲ្យ​លេចរូបរាងឡើង។

ក្នុងជំនួបពិភាក្សាការងារជាមួយរដ្ឋមន្ត្រីក្រសួងសាធារណការនិងដឹកជញ្ជូន លោក លី ខ័រ អគ្គនាយកក្រុមហ៊ុន China Metro Group នៃប្រទេសចិនបានជម្រាបអំពីវឌ្ឍនភាពនៃការសិក្សារបស់ក្រុមហ៊ុនលើគម្រោងអភិវឌ្ឍផ្លូវរថភ្លើងធុនស្រាល​ចំនួនពីរខ្សែ គឺ៖ ទី១ គម្រោងផ្លូវរថភ្លើងធុនស្រាលតភ្ជាប់ពីអាកាសយានដ្ឋានអន្តរជាតិខេត្តសៀមរាប-អង្គរ ទៅកាន់ក្រុងសៀមរាប និង ទី២ គម្រោងផ្លូវរថភ្លើងធុនស្រាលតភ្ជាប់ពីអាកាសយានដ្ឋានអន្តរជាតិតេជោ ក្រុងតាខ្មៅ មកកាន់រាជធានីភ្នំពេញ។

ចំពោះការសិក្សាគម្រោងអភិវឌ្ឍផ្លូវរថភ្លើងធុនស្រាលទាំងពីរខ្សែខាងលើ ជា​ការ​ឆ្លើយតប លោក ប៉េង ពោធិ៍នា រដ្ឋមន្រ្តី​ក្រសួង​សាធារណការ​​និង​ដឹកជញ្ជូន​រំពឹងថា នឹងរួមចំណែកក្នុងការកាត់បន្ថយបញ្ហាកកស្ទះចរាចរណ៍ និងផ្តល់នូវ​ជម្រើសបន្ថែម​ក្នុងការធ្វើដំណើរជូនដល់បងប្អូនប្រជាពលរដ្ឋកម្ពុជា ក៏ដូចជាភ្ញៀវទេសចរផងដែរ៕