ព័ត៌មានជាតិ

ក្រុមហ៊ុនមួយ បង្ហាញគម្រោងចង់វិនិយោគកែច្នៃប្លាស្ទិកឡើងវិញ លទ្ធភាពនាំទៅកាន់ទីផ្សារអន្តរជាតិ

បានផុស

១២ ខែ មុន

នៅ

ថ្ងៃព្រហស្បតិ៍ ២២ កុម្ភៈ ២០២៤

ដោយ

ក្រុមហ៊ុន អេ១ ប្លាស្ទីក រីសសន៍ លីមីធីត បានបង្ហាញគម្រោងចង់វិនិយោគលើសំណល់ប្លាស្ទិកនៅកម្ពុជា តាមរយៈការកែច្នៃសំណល់ប្លាស្ទិកឡើងវិញ ដែលមានលក្ខណៈជាពាណិជ្ជកម្ម និងមានលទ្ធភាពនាំទៅកាន់ទីផ្សារអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសចូលជួបសម្តែងការគួរសមនិងពិភាក្សាការងារជាមួយរដ្ឋមន្ត្រីក្រសួងបរិស្ថាន កាលពីថ្ងៃទី២១ ខែកុម្ភៈ ឆ្នាំ២០២៤ លោកស្រី លី ហុងឡានដេបូរា អាន់នី (LEE Hong Lan Deborah Anne) ប្រធាននិងនាយកប្រតិបត្តិក្រុមហ៊ុន អេ១ ប្លាស្ទីក រីសសន៍ លីមីធីត បានថ្លែងសរសើរចំពោះកិច្ចខិតខំប្រឹងប្រែងរបស់ក្រសួងបរិស្ថាន ដែលធ្វើឲ្យការនាំចូលថង់ប្លាស្ទិកមានការថយចុះជាង ៥០%។

នៅចំពោះមុខរដ្ឋមន្ត្រីក្រសួងបរិស្ថាន លោកស្រី បានគូសបញ្ជាក់ពីឱកាសវិនិយោគលើការកែច្នៃប្លាស្ទិកឡើងវិញ ដោយប្រព័ន្ធ Recycled Polyethylene Terephthalate (RPET) ដើម្បីចូលរួមចំណែកជាមួយក្រសួងបរិស្ថាន ក្នុងការកាត់បន្ថយសំណល់ប្លាស្ទិកពីអាជីវកម្ម និងអ្នកប្រើប្រាស់ ព្រមទាំងបានបង្ហាញពីដំណើរការផលិតកម្ម ដែលផ្តល់អត្ថប្រយោជន៍ ដល់ការលើកស្ទួយសេដ្ឋកិច្ចរបស់ប្រជាពលរដ្ឋផងដែរ។

ជាការឆ្លើយតប លោក អ៊ាង សុផល្លែត រដ្ឋមន្ត្រីក្រសួងបរិស្ថានគាំទ្រចំពោះសកម្មភាពវិនិយោគទាំងឡាយណា ដែលគិតគូរដល់ប្រយោជន៍ប្រជាពលរដ្ឋ និងប្រជាសហគមន៍មូលដ្ឋានជាធំ ជាពិសេសរួមចំណែកធ្វើឲ្យសហគមន៍មានភាពជាម្ចាស់ការ គិតគូរដល់ផលប៉ះពាល់បរិស្ថាន ស្របតាមយុទ្ធសាស្រ្តបញ្ចកោណរបស់រាជរដ្ឋាភិបាលកម្ពុជាដំណាក់កាលទី១៕

Related Topics:លោក អ៊ាង សុផល្លែត