ព័ត៌មានជាតិ

សមាជិកសភា និងក្រុមប្រឹក្សាឃុំ-សង្កាត់ ជាង ៥ រយនាក់ ទៅបោះឆ្នោតជ្រើសតាំងព្រឹទ្ធសភា ដូចការគ្រោងទុក នៅខេត្តបន្ទាយមានជ័យ

បានផុស

១២ ខែ មុន

នៅ

ថ្ងៃអាទិត្យ ២៥ កុម្ភៈ ២០២៤

ដោយ

នាព្រឹកថ្ងៃទី ២៥ ខែកុម្ភៈ ឆ្នាំ ២០២៤ នេះ អង្គបោះឆ្នោតជាសមាជិករដ្ឋសភា ចំនួន ៦ នាក់ និងក្រុមប្រឹក្សាឃុំ-សង្កាត់ ៥៣៣ នាក់ បានចូលរួមបោះឆ្នោតជ្រើសតាំងព្រឹទ្ធសភាដូចគ្រោងទុក សម្រាប់នីតិកាលទី ៥ ឆ្នាំ ២០២៤ នៅសាលាគរុកោសល្យ ភូមិ ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ការបោះឆ្នោតនេះមានសមាជិករដ្ឋសភាមកពីគណបក្សប្រជាជនកម្ពុជា ចំនួន ៦ រូប រួមមាន ៖ ១.លោក កែ គឹមយ៉ាន ,២.លោកស្រី នួម សោភ័ណ , ៣.លោក សេរី កុសល ,៤.លោក គោស៊ុំ សារឿត ,៥.លោក អ៊ី ឡុង ,៦.លោក ខេង ស៊ុ។ ចំណែកសមាជិកអង្គ ឬ អ្នកបោះឆ្នោតជាក្រុមប្រឹក្សាឃុំ-សង្កាត់ ទាំង ៥៣៣ នាក់ ស្រី ៩៨ នាក់ នៃគណបក្ស ៤ ចូលរួមមាន ៖ ១.គណបក្សប្រជាជនកម្ពុជា ,២.គណបក្សហ្វ៊ុនស៊ិនប៉ិច ,៣.គណបក្ស ឆន្ទៈខ្មែរ និង ៤.គណបក្ស កម្លាំងជាតិ។ បន្ថែមនោះ ការិយាល័យលេខ ៤០០១ ក៏មានសមាជិកបានមកតម្រង់ជួរចូលរួមបោះឆ្នោតអសកលនេះជាបន្តបន្ទាប់ផងដែរ។

លោក កែ គឹមយ៉ាន អ្នកតំណាងរាស្ត្រមណ្ឌលខេត្តបន្ទាយមានជ័យ បានមានប្រសាសន៍ថា កាលពីថ្ងៃទី ២៣ ខែកុម្ភៈ ឆ្នាំ ២០២៤ លោក និងអង្គបោះឆ្នោតទូទាំងខេត្តបន្ទាយមានជ័យ បានប្រារព្ធក្បួនដង្ហែ និងមិទ្ទីញបិទយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភានីតិកាលទី ៥។ ដោយឡែក នៅថ្ងៃទី ២៥ កុម្ភៈនេះ អង្គបោះឆ្នោត បានចូលរួមបោះឆ្នោតទាំងអស់ ដើម្បីសម្ដែងសិទ្ធិបោះឆ្នោតជ្រើសរើសបេក្ខជនសមាជិកព្រឹទ្ធសភាខ្លួនពេញចិត្ត ដែលអង្គបោះឆ្នោតមកពីគណបក្សទាំង ៤ នេះ គ្មាននរណាម្នាក់អវត្តមានឡើយ។

លោកមានប្រសាសន៍បន្តថា ការបោះឆ្នោតជ្រើសតាំងសមាជិកព្រឹទ្ធសភានីតិកាលទី ៥ នេះ ស្របតាមគោលការណ៍ច្បាប់ និងតាមបែបលទ្ធិប្រជាធិបតេយ្យ សេរីពហុបក្ស ហើយស្ថិតក្នុងបរិយាកាសសេរី ត្រឹមត្រូវ យុត្តិធម៌ ដោយគ្រប់គណបក្សនយោបាយ និងបេក្ខជន បានចូលរួមឈរឈ្មោះឲ្យអង្គបោះឆ្នោតអសកល ដើម្បីក្លាយជាតំណាង នៃស្ថាប័ននីតិប្បញ្ញត្តិ និងបម្រើជាតិ។

ដោយឡែក លោក យ៉ង់ សក្តិ ប្រធានគណៈកម្មាធិការខេត្តរៀបចំការបោះឆ្នោតខេត្តបន្ទាយមានជ័យ ក៏បានឲ្យដឹងដែរថា បន្ទាប់ពីយុទ្ធនាការឃោសនាបោះឆ្នោតជ្រើសតាំងព្រឹទ្ធសភាកន្លងមក ថ្ងៃនេះអង្គបោះឆ្នោតរបស់គណបក្សទាំង ៤ គឺ ១.គណបក្សប្រជាជនកម្ពុជា ,២.គណបក្សហ្វ៊ុនស៊ិនប៉ិច ,៣.គណបក្ស ឆន្ទៈខ្មែរ និង ៤.គណបក្ស កម្លាំងជាតិ បានមកបោះឆ្នោតប្រកបដោយបរិយាកាសរីករាយ។ ក្នុងនោះ គ ជ ខ បានរៀបចំការិយាល័យបោះឆ្នោតដាក់មន្ត្រី កងសន្តិសុខ និងទទួលអ្នកសង្កេតការណ៍ជាតិពីគណបក្សនយោបាយទាំង ៤ អង្គការក្រៅរដ្ឋាភិបាលខ្លះ មកបោះឆ្នោតជ្រើសតាំងព្រឹទ្ធសភា ចាត់ទុកដំណើរការបោះឆ្នោតនេះថា ប្រព្រឹត្តិទៅដោយសេរី យុត្តិធម៌ និងស្របតាមលទ្ធិប្រជាធិបតេយ្យផងដែរ។

ទន្ទឹមនោះ លោក យ៉ង់ សក្តិ ក៏បានអគុណដល់ គ ជ ខ និង គ ជ ប ក៏ដូចជាអាជ្ញាធរមានសមត្ថកិច្ចដែលបានរៀបចំដំណើរការបោះឆ្នោតនេះបានល្អ រលូន និងបរិយាកាសគ្មានការកៀបសង្កត់ គំរាមកំហែង។

គួរបញ្ជាក់ថា ទូទាំងខេត្តបន្ទាយមានជ័យ មានអង្គបោះឆ្នោតអសកលសរុប ៥៣៩ នាក់ ស្រី ៩៨ នាក់ ក្នុងនោះក្រុមប្រឹក្សាឃុំ-សង្កាត់ ៥៣៣ នាក់ និងសមាជិករដ្ឋសភា ៦ នាក់។ ក្នុងការបោះឆ្នោតអសកលជ្រើសតាំងព្រឹទ្ធសភានីតិកាលទី ៥ ឆ្នាំ ២០២៤ នេះ ប្រទេសកម្ពុជា បានចែកមណ្ឌលព្រឹទ្ធសភាជា ៨ ភូមិភាគព្រឹទ្ធសភា។ ក្នុងនោះ ខេត្តបន្ទាយមានជ័យ បាត់ដំបង ប៉ៃលិន សៀមរាប និងឧត្តរមានជ័យ ស្ថិតក្នុងភូមិភាគ ៤ មានអាសនៈសមាជិកព្រឹទ្ធសភាចំនួន ១០ អាសនៈ និងអង្គបោះឆ្នោតសរុប ៥៣៩ នាក់៕

អត្ថបទ ៖ វ៉ាន់ ណាង