ជិត ១សប្ដាហ៍ លោក ប្រាយ រ៉ាវុធ លក់ឆៃថាវបានប្រមាណជាង ១៥តោន ក្រោយបារម្ភរឿងទីផ្សារកន្លងមក

លោក ប្រាយ រ៉ាវុធ កសិករដាំឆៃថាវ ស្ថិតនៅក្នុងភូមិ សំរោងពងទឹក ឃុំ ភារីមានជ័យ ស្រុក បសេដ្ឋ ខេត្ត កំពង់ស្ពឺ បានប្រាប់ឱ្យដឹងថា ត្រឹមរយៈពេលជិត ១សប្ដាហ៍ លោកអាចប្រមូលទិន្នផលឆៃថាវ លក់ចេញទៅកាន់ទីផ្សារបានប្រមាណជាង ១៥តោន ខណៈដែលលោក អះអាងថា មានឆៃថាវ ក្នុងចំការសរុបមានចំនួនជាង ២០តោន តាមការប៉ាន់ស្មាន កន្លងមក។

លោក ប្រាយ រ៉ាវុធ កសិករដាំឆៃថាវ បន្ថែមទៀតថា សម្រាប់តម្លៃលក់ចេញ ​នៅឆ្នាំនេះ លោកអាចលក់ចេញទៅកាន់ទីផ្សារបានក្នុងតម្លៃ បោះដុំ ១គីឡូក្រាម ៦០០រៀល និងលក់រាយ ក្នុងតម្លៃ ៦០០រៀល ទៅ ៧០០រៀល ក្នុង ១គីឡូក្រាម ទៅតាមតម្លៃទីផ្សារបច្ចុប្បន្ន។

កសិកររូបនេះ បន្តទៀតថា សម្រាប់អតិថិជន ឬម៉ូយ ដែលមកទិញដល់ចំការ ភាគច្រើនគឺ អាជីវករ រស់នៅក្នុងមូលដ្ឋានជាមួយគ្នា ដែលពួកគាត់មកទទួលទិញយកទៅលក់បន្តនៅផ្សារក្បែរៗផ្ទះ និងខ្លះទៀតជាអ្នកដំណើរដែលមកដើរលេងកម្សន្ត ក៏បានជួយទិញឆៃថាវ ពីចំការរបស់លោកទៅផ្ញើបងប្អូន នៅរាជធានីភ្នំពេញ ផងដែរ។

លោក ប្រាយ រ៉ាវុធ ក៏បានបញ្ជាក់ទៀតថា បើធៀបទៅនឹងបណ្ដាឆ្នាំមុនៗ តម្លៃឆៃថាវ មានការថយចុះយ៉ាងខ្លាំង តែលោកនៅតែបន្តលក់ចេញដើម្បីបានថវិកាខ្លះមកវិញ ព្រោះការដាំឆៃថាវ នៅឆ្នាំនេះ ត្រូវចំណាយថ្លៃដើមទៅលើជី និងទឹកសម្រាប់ស្រោចស្រពដំណាំ ម្ល៉ោះហើយ ទើបលោកត្រូវប្រញាប់លក់ចេញ ម៉្យាងដោយសារតម្លៃទីផ្សារបច្ចុប្បន្ននេះមានការថយចុះដូចគ្នា មិនថាដំណាំ ឆៃថាវ ស្វាយ ត្រសក់ នោះទេ គឺអាចលក់ចេញបានត្រឹមតែ ក្នុងតម្លៃមួយដែលអាចទប់ទល់នឹងថ្លៃដើម តែប៉ុណ្ណោះ៕

អត្ថបទ ៖ សួស សិត