ដំណើរទស្សនកិច្ចរបស់សម្ដេចធិបតី ហ៊ុន ម៉ាណែត ទៅកាន់ប្រទេសម៉ាឡេស៊ី នឹងពង្រឹងបន្ថែមទៀតនូវទំនាក់ទំនងរវាងប្រទេសទាំងពីរ

ដំណើរទស្សនកិច្ចរបស់សម្ដេចធិបតី​ ហ៊ុន ម៉ាណែត នាយករដ្ឋមន្ត្រីនៃកម្ពុជា ទៅកាន់ប្រទេសម៉ាឡេស៊ី គឺដើម្បីធ្វើឲ្យកាន់តែស៊ីជម្រៅបន្ថែមទៀត ចំពោះចំណងទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ទៅលើវិស័យជាច្រើន។ នេះបើតាមលើកឡើងរបស់លោក មាស សុភ័ណ្ឌ អ្នកនាំពាក្យនាយករដ្ឋមន្ត្រី។

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅព្រឹកព្រលឹមថ្ងៃទី ២៧ ខែកុម្ភៈ ឆ្នាំ ២០២៤នេះ បានដឹកគណៈប្រតិភូជាន់ខ្ពស់ នៃរាជរដ្ឋាភិបាលកម្ពុជា អញ្ជើញទៅបំពេញទស្សនកិច្ចផ្លូវការ នៅប្រទេសម៉ាឡេស៊ី។ លោក មាស សុភ័ណ្ឌ មានប្រសាសន៍ប្រាប់ក្រុមអ្នកសារព័ត៌មានថា ដំណើរទស្សនកិច្ចរបស់សម្ដេចធិបតី ហ៊ុន ម៉ាណែត ទៅកាន់ប្រទេសម៉ាឡេស៊ី នឹងពង្រឹងបន្ថែមទៀតនូវទំនាក់ទំនងរវាងប្រទេសទាំងពីរ។

ក្នុងឱកាសបំពេញទស្សនកិច្ចផ្លូវការនេះ សម្ដេចធិបតី ហ៊ុន ម៉ាណែត​ នាយករដ្ឋមន្ត្រីកម្ពុជា នឹងមានជំនួបទ្វេភាគីជាមួយលោក អានវ៉ា អ៊ីប្រាហ៊ីម​ នាយករដ្ឋមន្រ្តីម៉ាឡេស៊ី ដើម្បីធ្វើឲ្យកាន់តែស៊ីជម្រៅបន្ថែមទៀត ចំពោះចំណងទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ទៅលើវិស័យជាច្រើន រួមមាន៖ វិស័យនយោបាយ, សេដ្ឋកិច្ច, ពាណិជ្ជកម្ម និងវិនិយោគ, ការពារជាតិ និងសន្តិសុខ, ការងារ, ទេសចរណ៍, បច្ចេកវិទ្យាឌីជីថល និងវិស័យសន្តិសុខថាមពល ជាដើម។

នៅក្នុងជំនួបនោះដែរ ថ្នាក់ដឹកនាំប្រទេសទាំងពីរ ក៏មានការផ្លាស់ប្ដូរទស្សនៈគ្នាទៅវិញទៅមកអំពីបញ្ហាតំបន់ និងអន្តរជាតិ ដែលបម្រើដល់ផលប្រយោជន៍រួមនៃប្រទេសទាំងពីរ ក៏ដូចជាក្នុងតំបន់។ ក្រៅពីនេះទៀត សម្ដេចធិបតី ហ៊ុន ម៉ាណែត និងលោក អានវ៉ា អ៊ីប្រាហ៊ីម នឹងអញ្ជើញជាសាក្សីនៅក្នុងពិធីចុះហត្ថលេខា លើឯកសារអនុស្សារណៈយោគយល់គ្នាចំនួន ៣ ហើយក៏នឹងធ្វើសន្និសីទសារព័ត៌មានរួមគ្នា ផងដែរ។

បន្ថែមលើនេះទៀត សម្ដេចធិបតី ហ៊ុន ម៉ាណែត ក៏នឹងអញ្ជើញជាអធិបតីនៅក្នុងវេទិកាធុរកិច្ចកម្ពុជា-ម៉ាឡេស៊ីឆ្នាំ ២០២៤ ដោយនឹងថ្លែងសុរន្ទកថាគន្លឹះ ស្ដីពី គោលនយោបាយសេដ្ឋកិច្ចរបស់រាជរដ្ឋាភិបាលកម្ពុជា និងទំនាក់ទំនងសេដ្ឋកិច្ចកម្ពុជា-ម៉ាឡេស៊ី ហើយក៏នឹងទទួលជួបសម្ដែងការគួរសមពីសំណាក់ថ្នាក់ដឹកនាំធនាគារ មេប៊ែង នៃប្រទេសម៉ាឡេស៊ី។

ដំណើរទស្សនកិច្ចផ្លូវការទៅកាន់ប្រទេសម៉ាឡេស៊ីនាពេលនេះ គឺជាការបន្តបេសកកម្មការទូតក្រៅប្រទេសលើកទី ១១ ដែលជាការបន្តបេសកកម្មការទូតឈរ លើគោលការណ៍នៃការឹតចំណងមិត្តភាព និងកិច្ចសហប្រតិបត្តិការ ដោយប្រកាន់ខ្ជាប់អធិបតេយ្យភាព និងស្វែងរកផលប្រយោផន៍ជូនជាតិ និងប្រជាជន៕