មួយសប្ដាហ៍មកនេះ សមត្ថកិច្ចក្រសួងមហាផ្ទៃ បានឃាត់ខ្លួនមនុស្ស៩៤នាក់ក្នុងបទល្មើសព្រហ្មទណ្ឌ៦១ករណី

យ៉ាងហោចណាស់មានជនសង្ស័យចំនួន៩៤នាក់ ត្រូវបានកម្លាំងនគរបាលជាតិ នៃក្រសួងមហាផ្ទៃ ចាប់ឃាត់ខ្លួនជាបន្តបន្ទាប់ ក្នុងរយៈពេលពេញមួយសប្ដាហ៍មកនេះ ក្នុងប្រតិបត្តិការបង្ក្រាបបទល្មើសព្រហ្មទណ្ឌ ចំនួន៦១ករណី គិតចាប់ពីថ្ងៃទី១៩ ដល់ថ្ងៃទី២៥ ខែកុម្ភៈ ឆ្នាំ២០២៤។ នេះបើតាមលោក ទូច សុខៈ អ្នកនាំពាក្យរងក្រសួងមហាផ្ទៃ។

អ្នកនាំពាក្យរងក្រសួងមហាផ្ទៃ បានឱ្យដឹងថា បទល្មើសដែលបានបង្ក្រាប និងជនសង្ស័យដែលបានចាប់ខ្លួន ភាគច្រើនពាក់ព័ន្ធនឹងការប្រព្រឹត្តិអំពើលួចច្រើនជាងគេ គឺចំនួន១៩ករណី ករណីហិង្សានៅលំដាប់ទី២ គឺ១៥ករណី និងក្រៅពីនេះ មានករណីប្លន់៧ករណី ឃាតកម្ម៥ករណី រំលោភពសេពសន្ថវៈ៤ករណី និងបទល្មើសផ្សេងៗទៀត។ លោក បញ្ជាក់ថា ចំនួនជនសង្ស័យដែលចាប់ខ្លួន បានកើនឡើងជាង៣០នាក់ បើធៀបនឹងសប្ដាហ៍មុន។

បើតាមលោក ទូច សុខៈ នេះជាឆន្ទៈរបស់នគរបាលក្នុងការអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាព ដែលបានកំណត់អំពីការគ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទល្មើសគ្រប់ប្រភេទ គ្មានអំពើអនាចារ គ្មានការជួញដូរមនុស្ស ពិសេសស្ត្រី និងកុមារគ្មានអំពើហិង្សាក្នុងគ្រួសារ និងគ្មានក្មេងទំនើង។

ស្របគ្នានេះ ក៏ជាការអនុវត្តទិសដៅមួយក្នុងចំណោមទិសដៅអាទិភាពទាំង៦ ដែលលោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានដាក់ចេញនាដើមអាណត្តិទី៧នេះ ក្រោមការដឹកនាំយ៉ាងស្វាហាប់របស់សម្ដេចធិបតីនាយករដ្ឋមន្ត្រី៕