​កម្ពុជា-ម៉ាឡេស៊ី ឯកភាពពិនិត្យលើការបង្កើនជើងហោះហើរ​ដើម្បីជំរុញទេសចរ​

ថ្នាក់ដឹកនាំជាន់ខ្ពស់កម្ពុជា និងម៉ាឡេស៊ី​បានឯកភាព​គ្នាក្នុងការពិនិត្យលើការពង្រីកជើងហោះហើរត្រង់រវាងប្រទេសទាំងពីរដើម្បីជំរុញ​ទេសចរបន្ថែមទៀត។

​ការឯកភាព កើតមានឡើងក្នុងឱកាសសម្ដេចធិបតី ហ៊ុន ម៉ាណែត ​នាយករដ្ឋ​មន្ត្រី​កម្ពុជាបានជួប​ប្រជុំពិភា​ក្សា​ការងារទ្វេភាគីជាមួយ លោក ដាតុ ស៊េរី អាន់វ៉ា អ៉ីប្រាហ៊ីម (Dato’ Seri Anwar Bin Ibrahim) នាយករដ្ឋមន្រ្តី នៃប្រទេសម៉ាឡេស៊ី ក្នុងឱកាសនៃដំណើរបំពេញទស្សនកិច្ចផ្លូវការ នៅប្រទេស​ម៉ាឡេ​ស៊ីនៅថ្ងៃទី ២៧ ខែកុម្ភៈ ឆ្នាំ ២០២៤។

ក្នុងឱកាសនោះ សមភាគីទាំងពីរបានពិភាក្សាក្នុងការពិនិត្យលទ្ធភាពពង្រីកនូវជើងហោះហើរផ្ទាល់ពីម៉ាឡេស៊ីទៅកាន់តំបន់ទេសចរណ៍សំខាន់ៗកម្ពុជា ដូចជាខេត្តសៀមរាប ផងដែរ។

ក្នុងក្របខ័ណ្ឌ នៃវិស័យការពារជាតិ និងសន្ដិសុខ សមភាគីទាំងពីរ បានឯកភាពលើការបន្តជំរុញ​នូវកិច្ចសហប្រតិបត្តិ​ការរួមមាន៖ ការបណ្តុះបណ្តាលធនធានមនុស្ស ការកសាងសមត្ថភាព ការផ្លាស់ប្តូរព័ត៌មាន និងការធ្វើលំហាត់រួមគ្នា។

ដោយឡែក លើវិស័យសន្តិសុខថាមពល សមភាគីទាំងពីរ ក៏បានឯកភាពក្នុងការគាំទ្រការសម្រប​សម្រួលសម្រាប់​គម្រោង​ខ្សែបញ្ជូនថាមពល​ក្រោមសមុទ្រ (ឡាវ-កម្ពុជា-សិង្ហបុរី) ដោយឆ្លងកាត់បាតសមុទ្ររបស់ប្រទេសម៉ាឡេស៊ី៕

​