ព័ត៌មានជាតិ

ក្រសួងមុខងារសាធារណៈ ជឿជាក់ថា ក្រសួង-ស្ថាប័ន ទាំងអស់ នឹងសហការក្នុងជវភាព នៃប្រព័ន្ធតួអង្គតែមួយ គាំទ្របេសកកម្មកែទម្រង់រដ្ឋបាលសាធារណៈ

បានផុស

១១ ខែ មុន

នៅ

ថ្ងៃអង្គារ ២៧ កុម្ភៈ ២០២៤

ដោយ

ក្រសួងមុខងារសាធារណៈ ជឿជាក់ថា ក្រសួង-ស្ថាប័ន ទាំងអស់ នឹងចូលរួមសហការយ៉ាងមោះមុត ក្នុងជវភាព នៃប្រព័ន្ធតួអង្គតែមួយ ដែលគាំទ្រដល់បេសកកម្មកែទម្រង់រដ្ឋបាលសាធារណៈ ជាពិសេសការកែលម្អការជ្រើសរើសមន្ត្រីរាជការស៊ីវិល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ២៧ ខែកុម្ភៈ ឆ្នាំ ២០២៤ នេះ តាមរយៈទំព័រហ្វេសប៊ុក ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ បានសរសេរថា ថ្ងៃនេះ ថ្នាក់ដឹកនាំ មន្ត្រីរាជការ ដែលជាតំណាងមកពីគ្រប់ក្រសួង-ស្ថាប័ន ទាំងអស់ បានអញ្ជើញជួបជុំគ្នាពិភាក្សា និងផ្ដល់ធាតុចូលលើសេចក្ដីព្រាងចំនួន ៥ ស្ដីពីការកែប្រែ និងដំឡើងប្រាក់បំណាច់មុខងារ និងប្រាក់ឧបត្ថម្ភ សម្រាប់ឆ្នាំ ២០២៤។

ឯកឧត្ដម ហ៊ុន ម៉ានី សរសេរបន្តថា តាមរយៈគោលនយោបាយ និងវិធានការនានា ដាក់ចេញកន្លងមក និងកំពុងរៀបចំ នាពេលនេះ សុទ្ធតែបង្ហាញពីការយកចិត្តទុកដាក់ រិះរកមធ្យោបាយគ្រប់សព្វបែបយ៉ាងតាមលទ្ធភាពរបស់រាជរដ្ឋាភិបាលជាប្រចាំ ចំពោះជីវភាព និងសុខុមាលភាពរបស់មន្ត្រីរាជការទាំងអស់ ដែលបានខិតខំប្រឹងប្រែងបំពេញភារកិច្ចជូនប្រទេសជាតិ និងប្រជាជន ហើយដែលឆ្លើយតបជាមួយការរីកលូតលាស់ នៃសង្គមជាតិ។

ឯកឧត្ដម ហ៊ុន ម៉ានី សរសេរបន្តទៀតថា ជាងនេះទៅទៀត ការចូលរួមជាធាតុចូលរបស់សមាជិក សមាជិកាអង្គប្រជុំ នាថ្ងៃនេះ បានរំលេចចេញនូវការគិតគូរគ្រប់ជ្រុងជ្រោយទាំងអស់ ក្នុងគោលដៅអភិវឌ្ឍន៍ និងការពារផលប្រយោជន៍មន្ត្រីរាជការគ្រប់ជាន់ថ្នាក់។

ជាមួយគ្នានេះ ឯកឧត្ដម ឧបនាយករដ្ឋមន្ត្រី ក៏បានសង្កត់ធ្ងន់ថា «ក្នុងនាមជាសេនាធិការរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតខ្ពស់របស់ សម្ដេចធិបតី នាយករដ្ឋមន្ត្រី ក្រសួងមុខងារសាធារណៈ ជឿជាក់ថា ក្រសួង-ស្ថាប័ន ទាំងអស់ នឹងចូលរួមសហការយ៉ាងមោះមុត ក្នុងជវភាព នៃប្រព័ន្ធតួអង្គតែមួយ ដែលគាំទ្រដល់បេសកកម្មកែទម្រង់រដ្ឋបាលសាធារណៈ ជាពិសេសការកែលម្អការជ្រើសរើសមន្ត្រីរាជការស៊ីវិល សហការក្នុងការងារវិភាគមុខងារក្រសួង ស្ថាប័ន អង្គភាព និងការងារកែលម្អប្រព័ន្ធការងារផ្សេងៗ ទៀត ក្នុងគោលដៅបម្រើសេវាជូនប្រជាជនកាន់តែប្រសើរ»៕

អត្ថបទ ៖ ពិសី