សម្ដេចធិបតី នឹងអញ្ជើញបើកកម្មវិធីបុណ្យទន្លេលើកទី៨ ដែលធ្វើឡើងនៅខេត្តសៀមរាប នាថ្ងៃទី១៦ខែមីនា

សម្ដេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នឹងអញ្ជើញជាអធិបតីដ៏ខ្ពង់ខ្ពស់ក្នុងកម្មវិធីបើកជាផ្លូវការ ពិធីបុណ្យទន្លេលើកទី៨ នៅខេត្តសៀមរាប នាថ្ងៃសៅរ៍ ទី១៦ ខែមីនា ឆ្នាំ២០២៤។ នេះបើតាមសេចក្ដីជូនដំណឹងរបស់គណៈកម្មការអន្តរក្រសួង ដើម្បីរៀបចំពិធីបុណ្យទន្លេ។

តាមសេចក្ដីជូនដំណឹងដដែល ពិធីបុណ្យទន្លេដែលរៀបចំឡើងក្រោមប្រធានបទ“ទន្លេដើម្បី សន្តិភាព និងការអភិវឌ្ឍ”នេះ  នឹងមាននូវការសម្តែងសិល្បៈ ការប្រគុំតន្ត្រី ចូលរួមពី ក្រុមសិល្បករ សិល្បការិនី តារាចំរៀងជាតិ និងអន្តរជាតិល្បីៗ ព្រមទាំងមានការអុចកាំជ្រួចអបអរសាទរពិធីបុណ្យទន្លេលើកទី៨ ឆ្នាំ២០២៤ ព្រមទាំងយុទ្ធនាការឆ្នាំទស្សនាសៀមរាប ២០២៤។ ការតាំងពិព័រណ៍ផលិតផលទេសចរណ៍ និងផលិតផលទូទៅ មហោស្រពម្ហូបអាហារមេគង្គ ព្រមទាំង សកម្មភាពកម្សាន្តនានានៅតាមបណ្តោយដងស្ទឹងសៀមរាប និងតំបន់ Pub Street។

តាមការរំពឹងទុកព្រឹត្តិការណ៍បុណ្យទន្លេដែលរៀបចំឡើងចាប់ពីថ្ងៃទី១៦ ដល់ថ្ងៃទី១៧ ខែមីនា ឆ្នាំ២០២៤នេះ នឹងរួមចំណែកជំរុញកំណើនភ្ញៀវទេសចរ និងបង្កើនការផ្សព្វផ្សាយសក្តានុពលទេសចរណ៍ខេត្តសៀមរាប និងបណ្តាខេត្ត តាមដងទន្លេនៃព្រះរាជាណាចក្រកម្ពុជា ព្រមទាំងជួយជំរុញផ្សព្វផ្សាយផងដែរនូវភាពសម្បូរបែបនៃអនុតំបន់មេគង្គ។

គួរជម្រាបជូនថា បុណ្យទន្លេ ត្រូវបានរៀបចំធ្វើឡើង ក្នុងគោលបំណងបំផុសចលនាមហាជនឱ្យចូលរួមក្នុងការងារអភិរក្ស និងអភិវឌ្ឍន៍ធនធានទន្លេប្រកបដោយនិរន្តភាព និងចូលរួមសម្រេចយុទ្ធសាស្ត្រពិពិធកម្មទេសចរណ៍តាមរយៈការបង្កើតព្រឹត្តិការណ៍ទេសចរណ៍ថ្មីៗ សម្រាប់ខេត្តតាមដងទន្លេនៃព្រះរាជាណាចក្រកម្ពុជា។​

រាជរដ្ឋាភិបាលកម្ពុជា បានកំណត់យកសប្ដាហ៍ទីមួយ ឬសប្ដាហ៍ទី២ នៃខែមីនា ជារៀងរាល់ឆ្នាំ ដើម្បីរៀបចំពិធីបុណ្យទន្លេ។

បុណ្យទន្លេ បានរៀបចំឡើងជាដំបូងបំផុតនៅខេត្តក្រចេះ នាឆ្នាំ២០១៥។ លើកទី២នៅខេត្តកំពង់ចាម រៀបចំឡើងចាប់ពីថ្ងៃទី១១ ដល់១៣ ខែមីនា ឆ្នាំ២០១៦។ លើកទី៣ រៀបចំឡើងនៅឆ្នាំ២០១៧ ក្នុងខេត្តស្ទឹងត្រែង។ លើកទី៤ រៀបចំឡើងនៅខេត្តកណ្ដាល នាឆ្នាំ២០១៨។ លើកទី៥ រៀបចំឡើងនៅឆ្នាំ២០១៩ ក្នុងខេត្តកំពង់ឆ្នាំង។ លើកទី៦ រៀបចំឡើងនៅខេត្តបាត់ដំបង ក្នុងឆ្នាំ២០២០។ ក្នុងឆ្នាំ២០២១ និង២០២២ ដោយសារតែញាំញ៉ីទៅវិបត្តិកូវីដ១៩ កម្ពុជាមិនបានរៀបចំពិធីបុណ្យទន្លេឡើយ។ ក្រោយស្ថានការណ៍កូវីដ១៩ បានធូរស្បើយ កម្ពុជា បានរៀបចំបុណ្យទន្លេលើកទី៧ ជាបន្តទៀត នៅលើទឹកដីខេត្តកំពង់ធំ៕