ព័ត៌មានជាតិ

មកដល់ពេលនេះ ប្រាក់រៀលខ្មែរអាចយកទៅចាយនៅ ៣ ប្រទេស តាមប្រព័ន្ធឃ្យូអរកូដ (KHQR)

បានផុស

១ year មុន

នៅ

ថ្ងៃអង្គារ ២៧ កុម្ភៈ ២០២៤

ដោយ

ស្របតាមការរីកចម្រើននៃបច្ចេកវិទ្យាហិរញ្ញវត្ថុ ធនាគារជាតិនៃកម្ពុជាបានចាប់ឱកាសអភិវឌ្ឍប្រព័ន្ធទូទាត់ ដែលបានធ្វើឱ្យការទូទាត់កាន់តែងាយស្រួល សុវត្ថិភាព និង ឆាប់រហ័ស ដោយបានដោះស្រាយឧបសគ្គក្នុងការទូទាត់ឆ្លងគ្រឹះស្ថាន និងការយកថ្លៃសេវាខ្ពស់។

ថ្លែងនៅក្នុងឱកាសបើកសន្និបាតបូកសរុបលទ្ធផលការងារប្រចាំឆ្នាំ ២០២៣ និងលើកទិសដៅឆ្នាំ ២០២៤ លោកស្រី ជា សិរី ទេសាភិបាលធនាគារជាតិកម្ពុជាបានថ្លែងថា បច្ចុប្បន្នប្រព័ន្ធឃ្យូអរកូដបានតភ្ជាប់ប្រព័ន្ធទូទាត់ជាមួយប្រទេសថៃ វៀតណាម និងឡាវ ព្រមទាំងក្រុមហ៊ុនផ្តល់សេវាទូទាត់អន្តរជាតិមួយចំនួនទៀត។ ឆាប់ៗនេះដែរ ក៏នឹងអាចតភ្ជាប់ជាមួយប្រទេសឥណ្ឌា និងចិន ជាមួយនឹងផែនការតភ្ជាប់ជាមួយប្រទេសផ្សេងទៀតក្នុងតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការពង្រីកការតភ្ជាប់ការប្រើប្រាស់ប្រព័ន្ធទូទាត់ឆ្លងដែននេះ នឹងបើកលទ្ធភាពឱ្យប្រជាជនកម្ពុជា អាចទូទាត់តាមប្រព័ន្ធឃ្យូអរកូតចេញពីគណនីប្រាក់រៀលរបស់ខ្លួន នៅតាមបណ្តាហាងទំនិញរាប់លានកន្លែង ហើយក៏ផ្ដល់លទ្ធភាពឱ្យប្រជាជននៅក្នុងប្រទេសនិងបណ្តាញដែលកម្ពុជាបានភ្ជាប់ប្រព័ន្ធទូទាត់ជាមួយ អាចទូទាត់នៅកម្ពុជាបានដោយងាយស្រួល។ នេះបើតាមលោកស្រី ជា សិរី។

លោកស្រីបន្ថែមថា ប្រសិទ្ធភាពនៃប្រព័ន្ធទូទាត់ឆ្លងដែននេះ ក៏នឹងរួមចំណែកក្នុងការជំរុញការដោះដូរទំនិញនិងសេវាបរិយាបន្នហិរញ្ញវត្ថុ និងការលើកម្ពស់ការប្រើប្រាស់ប្រាក់រៀល ដែលគាំទ្រដល់គោលដៅអភិវឌ្ឍសេដ្ឋកិច្ចនិងសង្គមឌីជីថលរបស់រាជរដ្ឋាភិបាល។ ម្យ៉ាងទៀត ការតភា្ជប់ប្រព័ន្ធទូទាត់កម្ពុជាជាមួយប្រទេសផ្សេងទៀតនៅក្នុងតំបន់ ក៏ចូលរួមលើកកម្ពស់ពាណិជ្ជកម្ម ការវិនិយោគ ទេសចរណ៍ និងការបង្វែរប្រាក់ពីក្រៅប្រទេស។

តាមរយៈប្រព័ន្ធទូទាត់ប្រាក់តាម QR code ពលរដ្ឋកម្ពុជាដែលមានគណនីធនគារជាប្រាក់រៀល ហើយធ្វើដំណើរទៅក្រៅប្រទេស (មានថៃ ឡាវ វៀតណាម) អាចទូទាត់ថ្លៃទំនិញឬសេវាកម្មផ្សេងៗ ដោយប្រើកម្មវិធីធនាគារចល័តតាមរយៈទូរសព្ទរបស់ធនាគារកម្ពុជាណាមួយឬតាមប្រព័ន្ធបាគង ដោយគ្រាន់តែចុចលើមុខងារស្កែនឃ្យូអរ។ ដូចគ្នានេះដែរ ពលរដ្ឋ (វៀតណាម ថៃ ឡាវ) ដែលធ្វើដំណើរមកកាន់ប្រទេសកម្ពុជា ក៏អាចទូទាត់ថ្លៃទំនិញឬសេវាកម្មផ្សេងៗតាមរយៈ ខេអេចឃ្យូអរ ( KHQR ) ដោយបើកកម្មវិធីធនាគារចល័តតាមរយៈទូរស័ព្ទរបស់ធនាគារ ហើយស្កែនខេអេចឃ្យូអរ (KHQR) របស់អាជីវករនៅកម្ពុជា៕