​រដ្ឋាភិបាលផ្អាកគម្រោងអភិវឌ្ឍទេសចរណ៍ឯកជន​មួយ​នៅជើងភ្នំ ១.៥០០ ក្រោយរកឃើញភាពមិនប្រក្រតី

អាជ្ញាធរខេត្តពោធិ៍សាត់នៅថ្ងៃទី ២៦ ខែកុម្ភៈ ឆ្នាំ ២០២៤ បានសម្រេចផ្អាកសកម្មភាពគម្រោងអភិវឌ្ឍន៍ទេសចរណ៍ផ្សារភ្ជាប់ និងធម្មជាតិរបស់លោកស្រី ស៊ឹង សុខអាង ស្ថិតនៅត្រង់ចំណុចជើងភ្នំ ១.៥០០ ជាបណ្ដោះអាសន្នក្រោយរកឃើញភាពមិនប្រក្រតី ដោយរង់ចាំការសិក្សាស្រាវជ្រាវឱ្យបានល្អិតល្អន់ ទើបសម្រេចជាថ្មីនៅពេលក្រោយ។

ក្រុមការងារអន្តរក្រសួងដែលរួមមាន ក្រសួងសាធារណការ និងដឹកជញ្ជូន ក្រសួងបរិស្ថាន ក្រសួងទេសចរណ៍ ក្រសួងរៀបចំដែនដី ក្រសួងអធិការកិច្ច អាជ្ញាធរខេត្តពោធិ៍សាត់ ដឹកនាំដោយដោយលោក ហួត ហាក់ រដ្ឋមន្ត្រីក្រសួងអធិការកិច្ច នៅថ្ងៃទី ២៦ ខែកុម្ភៈ ឆ្នាំ ២០២៤ បានចុះពិនិត្យទីតាំងជាក់ស្ដែងនៃការអង្កេតស្រាវជ្រាវភាពមិនប្រក្រតីលើគម្រោងអភិវឌ្ឍន៍​ទេសចរណ៍ផ្សារភ្ជាប់ និងធម្មជាតិថ្នាក់តូចរបស់លោកស្រី សុឹង សុខអាង ដោយធ្វើយ៉ាងណាឱ្យមានមូលដ្ឋានច្បាស់លាស់គ្រប់គ្រាន់ ដើម្បីរាយការណ៍ជូនប្រមុខរាជរដ្ឋាភិបាល។

ប៉ុន្តែចំពោះមុខក្រុមការងារបានបានផ្អាកដំណើរការគម្រោងនេះជាបណ្ដោះអាសន្នសិន ដោយសារឯកសារមិនមានផ្លូវច្បាប់ច្បាស់លាស់ និងទីតាំងមិនបានសមស្រប ចំពោះលទ្ធផលយ៉ាងណានោះរង់ចាំសម្រេចនៅពេលក្រោយ។

លោក ខួយ រីដា អភិបាលខេត្តពោធិ៍សាត់បានលើកឡើងថា ក្នុងនាមអាជ្ញាធរ សូមបង្ហាញការគាំទ្រ និងរីករាយទទួល​យក​គ្រប់ការអភិវឌ្ឍន៍ទាំងអស់ដែលធ្វើឱ្យជីវភាពប្រជាពលរដ្ឋបានល្អប្រសើរសេដ្ឋកិច្ចជាតិយើងរីកចម្រើន ប៉ុន្តែមិនគាំទ្រការអភិវឌ្ឍន៍ធ្វើឱ្យប៉ះពាល់ឡើយ៕

អត្ថបទ៖ លាន គ្រន