ឆ្នាំ២០២៣ កម្លាំងក្រសួងមហាផ្ទៃ បានបង្ក្រាបបទល្មើសព្រហ្មទណ្ឌជាង ៣ពាន់ករណី

ឆ្នាំ២០២៣ កន្លងទៅ កងកម្លាំងមានសមត្ថកិច្ចរបស់ក្រសួងមហាផ្ទៃ បានបង្ក្រាបបទល្មើសព្រហ្មទណ្ឌ ៣ ១៦៣ករណី ក្នុងចំណោមបទល្មើសជាង ៣ ៥០០ករណី ដោយបានឃាត់ខ្លួនជនសង្ស័យជាង ៥ពាន់នាក់នៅទូទាំងប្រទេស។ បើ ធៀបទៅនឹងរយៈពេលដូចគ្នា ឆ្នាំ២០២២ មានការកើនឡើងបទល្មើសចំនួន ៧៤១លើក ស្មើ ២៧ភាគរយ។

នៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារបន្ដរបស់ក្រសួងមហាផ្ទៃ នាព្រឹកថ្ងៃទី២៨ ខែកុម្ភៈ ឆ្នាំ២០២៤នេះ លោកឧត្ដមសេនីយ៍ឯក ផាត សុផានិត អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ បានថ្លែងថា សភាពការណ៍បទល្មើសព្រហ្មទណ្ឌ នៅតែមានភាពស្មុគស្មាញ និងមាននិន្នាការកើនឡើងនៅក្នុងឆ្នាំ២០២៣។ លោក ថា បទល្មើស ដែលបាននិងកំពុងកើតឡើងគួរឱ្យកត់សម្គាល់ គឺបទល្មើស លួច ឆក់ ប្លន់ ការចរាចរ ជួញដូរ និងប្រើប្រាស់គ្រឿងញៀនខុសច្បាប់ បទល្មើសជួញដូរមនុស្សលើគ្រប់ទម្រង់ បទល្មើសឆបោកតាមអនឡាញ បទល្មើសបច្ចេកវិទ្យា និងសកម្មភាពក្មេងទំនើង។

បើតាមការបញ្ជាក់របស់លោកឧត្ដមសេនីយ៍ឯក ផាត សុផានិត បទល្មើសព្រហ្មទណ្ឌមានចំនួន ៣ ៥១១លើក បានកើន ៧៤១លើក ស្មើ ២៧ភាគរយ ដែលក្នុងនោះ បទឧក្រិដ្ឋ ៦៦៨លើក និងបទមជ្ឈិម ២ ៨៤៣លើក។ ឧត្ដមសេនីយ៍ឯក បញ្ជាក់បន្ថែមថា ក្នុងចំណោមបទល្មើសព្រហ្មទណ្ឌ ដែលកើតមានឡើងនេះ សមត្ថកិច្ចបានបើកប្រតិបត្តិការស្រាវជ្រាវ ស៊ើបអង្កេត និងបង្ក្រាបបានចំនួន៣ ១៦៣ករណី ស្មើ ៩០ភាគរយ ឃាត់ខ្លួន ៥ ០៩០នាក់ (មានផ្ទុកសារធាតុញៀន ១ ៦៧០នាក់ ស្មើ ៣៣ភាគរយ) ក្នុងនោះ បទឧក្រិដ្ឋ ៦០៥ករណី ឃាត់ខ្លួន ១ ០៦៥នាក់ និងបទមជ្ឈិម ២ ៥៥៨ករណី ឃាត់ខ្លួន ៤ ០២៥នាក់ និងបានអនុវត្តដីកាឆ្នាំចាស់សរុប ១៧០ដីកា មានមនុស្ស ១៦៨នាក់។

ពាក់ព័ន្ធការបង្ក្រាបបទល្មើសគ្រឿងញៀន ត្រូវបានលោកឧត្ដមសេនីយ៍ឯក ផាត សុផានិត បញ្ជាក់ឱ្យដឹងថា នៅក្នុងឆ្នាំ២០២៣ គឺមានចំនួន ៧ ០៦២ករណី ឃាត់ខ្លួន ១៧ ៣៦៣នាក់ (ស្រី ១ ០៥៨នាក់ ជនបរទេស ៤៤១នាក់ ក្នុងចំណោម១៥សញ្ជាតិ) និងអនុវត្តដីកាបាន ៤៦៥ដីកា ឃាត់ខ្លួនបាន ៤៤៥នាក់ ស្រី ១៦នាក់។

ដោយឡែក សកម្មភាពបង្ក្រាបក្រុមក្មេងទំនើង គឺកើតមានឡើងបាន ១ ៣៧៦ករណី ឃាត់ខ្លួន ៣ ៣២៣នាក់ ក្នុងនោះ កសាងសំណុំរឿងបញ្ជូនទៅតុលាការ និងអប់រំណែនាំ ធ្វើកិច្ចសន្យាបញ្ឈប់សកម្មភាព។ ទន្ទឹមនេះ ការបង្ក្រាបល្បែងស៊ីសងខុសច្បាប់គ្រប់ប្រភេទបាន ១ ៧៨៦ករណី ឃាត់ខ្លួន ៣ ១៥៥នាក់ ដែលក្នុងនោះ កសាងសំណុំរឿងបញ្ជូនទៅតុលាការ ១៦៥ករណី និងអនុវត្តវិធានការរដ្ឋបាល ១ ៦២១ករណី៕