ណែនាំ​ឲ្យ​​ស្គាល់​រោងម៉ាស៊ី​នកិនស្រូវធំៗ​នៅ​ក្នុង​ខេត្តបាត់ដំបង

ខេត្តបាត់ដំបង ត្រូវបានគេស្គាល់ជាខេត្តផលិតស្រូវ​ដ៏ធំ​មួយ​នៅក្នុងចំណោមខេត្តដាំដុះស្រូវ​ធំៗ​​ដូចជា​ព្រៃវែង តាកែវ​ជាដើម។ ភាពរីកចម្រើនផ្នែកកសិកម្មបានជម្រុញឲ្យឈ្មួញបាន​បង្កើតរោងម៉ាសុីកិនស្រូវពីក្នុងក្រុងរហូតដល់តាមបណ្តាស្រុក។

តាម​មន្រ្តីកសិកម្ម​ខេត្ត​បាត់ដំបង ទូទាំង​ខេត្ត​មាន​រោង​ម៉ាសុីនកិនស្រូវជាច្រើន​កន្លែង​មាន​ទាំង​ខ្នាត​ធំ ខ្នាតមធ្យម​ និង​ខ្នាត​តូច រួមទាំង​ឡ​សម្ងួត​មួយ​ចំនួនផង​ដែរ។

លោក ហេង សិទ្ធ មន្ត្រីកសិកម្មខេត្តបាត់ដំបង​បាន​ឲ្យ​កម្ពុជាថ្មី​ដឹង​ថា​ បច្ចុប្បន្នទូទាំងខេត្តបាត់ដំបង មានម៉ាសុីនកិនស្រូវចំនួន ៦៥៨ គ្រឿង ក្នុងនោះខ្នាតធំសម្រាប់ផលិតជាអង្កនាំចេញទៅ​ក្រៅប្រទេសមានចំនួន ១១៤ គ្រឿង ខ្នាតមធ្យម មាន​ចំនួន ២៦១ គ្រឿង និងខ្នាតតូចមាន ២៨៣ គ្រឿង ហើយក្នុងនោះមានឡសម្ងួតមានចំនួន ៩៦ គ្រឿង។

ពាក់ព័ន្ធ​​រោងម៉ាស៊ីន​ខ្នាត​ធំ​ៗ​នៅ​ក្នុង​ខេត្ត​បាត់ដំបង មន្រ្តីកសិកម្ម​រូបនេះបាន​​បង្ហើប​មានដូចជា៖

-រោងម៉ាសុីន “តុងវីតែន” ស្ថិតក្នុងភូមិមោង ឃុំមោង ស្រុកមោងឫស្សី ខេត្តបាត់ដំបង
-រោងម៉ាសុីន “ជា ហេង” ស្ថិតនៅក្នុង ភូមិកៀនកេះ ឃុំគោកឃ្មុំ ស្រុកថ្មគោល ខេត្តបាត់ដំបង
-រោងម៉ាស៊ីន “យិនម៉ាន់” ស្ថិតក្នុងស្រុកបវេល
-រោងម៉ាស៊ីន “ឡាយ សែ” ស្ថិតក្នុងស្រុកថ្មគោល
-រោងម៉ាសុីន​ក្រុមហ៊ុន “ភីអុិលសុី” ស្ថិតក្នុងសង្កាត់អូចារ ក្រុងបាត់ដំបង
-រោងម៉ាសុីន “ភួប៉ូយ” ស្ថិតក្នុង ភូមិស្វាយចំនីក ឃុំអង្លង់វិល ស្រុកសង្កែ
-រោងម៉ាស៊ីន​ “ទ្រួនធួក” ស្ថិតក្នុង ឃុំអូរតាគី ស្រុកថ្មគោល
-រោងម៉ាសុីន “សៀងហៃ” ស្ថិតក្នុងស្រុកថ្មគោល
-រោងម៉ាសុីនរបស់ក្រុមហ៊ុន “អេមរុរាយស៍ខេមបូឌាខូអិលធីឌី” ក្នុងស្រុកសង្កែ
-រោងម៉ាស៊ីន “បាត់ដំបងរាយស៍” ក្នុងស្រុកថ្មគោល
-រោងម៉ាសុីន “ជីងមី” ក្នុងស្រុកថ្មគោល
-រោងម៉ាសុីន “ផូវថូវ” ក្នុងស្រុកបវេល
-រោងម៉ាសុីន ” អៀង ហ៊ាង” ក្នុងស្រុកសង្កែ
-រោងម៉ាស៊ីន “ជ្រួ ថុល”
-រោងម៉ាស៊ីន “ខ្មែរហ្វួតក្រុប” ស្ថិតក្នុងស្រុកថ្មគោល​ជាដើម។

កសិករក្នុងស្រុកមោងឫស្សី លោក ណុប ឡឹប និង អ្នកស្រី សួន ថាន លើកឡើង​ដូច​គ្នា​ៗ​ថា កាល​ពី​មុន​​ត្រូវការ​អង្ករដាំបាយ​ត្រូវដឹកតាមម៉ូតូរម៉កទៅកិននៅខេត្តឬកិនត្បាល់ដៃ តែបច្ចុប្បន្ន​មាន​រោងម៉ាស៊ីននៅក្បែរផ្ទះងាយស្រួលកាត់បន្ថយ​ការ​ចំណាយ​បាន​ច្រើន។

លោក ហេង សិទ្ធ បាន​អះអាង​ថា ការ​កើនការ​ដាំដុះ​ស្រូវ​ទាំងស្រូវតាមរដូវទាំងស្រូវខុសរដូវ បាន​ជម្រុញឲ្យឈ្មួញបង្កើតរោង​ម៉ាសុីនកិនស្រូវកើនឡើងខ្ពស់តាមតម្រូវការរបស់ប្រជាកសិករនៅតាមបណ្តាស្រុកទូទាំងខេត្ត៕

អត្ថបទ៖ សៅ សារិទ្ធ