ព័ត៌មានជាតិ

អ្នកជំនាញ ជំរុញឱ្យគ្រប់គ្រឹះស្ថានសិក្សាទាំងអស់ ចូលរួមលើកតម្កើងអក្សរសាស្ត្រជាតិ

បានផុស

១០ ខែ មុន

នៅ

ថ្ងៃព្រហស្បតិ៍ ២៩ កុម្ភៈ ២០២៤

ដោយ

អ្នកជំនាញអប់រំ បានជំរុញគ្រប់គ្រឹះស្ថានសិក្សាទាំងអស់ សហការជាមួយក្រសួងអប់រំ យុវជន និងកីឡា ចូលរួមលើកតម្កើងអក្សរសាស្ត្រជាតិ តាមរយៈការបង្រៀនក្មេងៗ ចេះសរសេរពាក្យ និងបញ្ចេញសំនៀងភាសាខ្មែរឱ្យបានត្រឹមត្រូវ ខណៈបច្ចុប្បន្នការសរសេរសំណេរ និងអក្ខរាវិរុទ្ធភាសាខ្មែរ នៅលើបណ្ដាញសង្គមមួយចំនួន មានការខុសឆ្គងច្រើន។

លោក គង់ សំនៀង ប្រធានសហព័ន្ធសេវាអប់រំនៅកម្ពុជា បានមានប្រសាសន៍ថា គ្រប់គ្រឹះស្ថានសិក្សាទាំងអស់ គួរតែយកចិត្តទុកដាក់ចូលរួមជាមួយក្រសួងអប់រំ យុវជន និងកីឡា ដើម្បីលើកតម្កើងអក្សរសាស្ត្រជាតិ ចាប់ផ្ដើមយកចិត្តទុកដាក់បង្ហាត់បង្រៀនក្មេងចាប់តាំងពីកម្រិតថ្នាក់ទី ១ ដើម្បីឱ្យគាត់ស្គាល់ពីសូរសៀងសូរស័ព្ទការសរសេរពាក្យភាសាខ្មែរឱ្យបានត្រឹមត្រូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា «អីចឹង ដើម្បីបណ្ដុះឱ្យភាសានឹងមានលក្ខណៈទូលំទូលាយ ក្មេងគ្រប់រូប ឬ អ្នកប្រើប្រាស់បណ្ដាញសង្គម អាចសរសេរបានដោយងាយស្រួល វាពាក់ព័ន្ធជាមួយនឹងក្រសួងអប់រំដោយសារក្រសួងអប់រំ ជាមេបា ជាអ្នកដែលធ្វើការបណ្ដុះបណ្ដាលភាសាជាតិ។ ក្មេងៗ មួយចំនួន មិនសរសេរភាសាជាតិទេ គាត់ប្រើប្រាស់ជាភាសាអង់គ្លេស និងភាសាផ្លូវកាត់ក្នុងការសរសេរ ដោយសារពេលខ្លះគាត់ពិបាកក្នុងការសរសេរជាភាសាខ្មែរ ហើយសរសេរទៅខ្លាចខុស និងខ្លាចគេរិះគន់»។

លោកបានបន្តទៀតថា «ឥឡូវនេះ បើយើងយកមកកែបណ្ដាជនទូទៅដែលប្រើហ្វេសប៊ុក ពេលខ្លះវាពិបាក និងហួសពេលទៅហើយ។ អ្នកខ្លះមិនបានយកចិត្តទុកដាក់រៀនពីក្មេង អីចឹងការសរសេរភាសា ការបម្រែបម្រួលភាសា អត់បានយល់ស៊ីជម្រៅទេ ដល់អីចឹងពេលសរសេរទៅវាខុសដូចជាពាក្យឱ្យខ្លះសរសេរអោយនៅឡើយទេ»។

លោកបានណែនាំអ្នកប្រើប្រាស់បណ្ដាញសង្គម ចូលរួមលើកតម្កើងភាសាជាតិទាំងអស់គ្នា ឱ្យបានទូលំទូលាយ ដោយប្រើប្រាស់ភាសាខ្មែរឱ្យត្រឹមត្រូវ និងបើអាចជៀសបានសូមកុំប្រើភាសាបរទេស។

លោកបានបន្ថែមថា «នៅតាមបណ្ដាប្រទេសក្នុងតំបន់ ពិសេសនៅប្រទេសថៃ គេសរសេរភាសាគេក្នុងបណ្ដាញហ្វេសប៊ុក គេមិនសូវប្រើភាសាអង់គ្លេសទេ។ អីចឹងហើយបានជាហ្គោលហ្គលត្រេនស្លេត ព្យាយាមដើម្បីធ្វើហ្គោលហ្គលត្រេនស្លេតហ្នឹងឱ្យទៅជាភាសាអង់គ្លេស ដើម្បីអាចឱ្យអ្នកផ្សេងអាចចង់មើលខ្លឹមសារ ឬ ពាក្យពេចន៍ ដែលប្រជាជន នៃជាតិសាសន៍នីមួយៗ សរសេរ គេប្រើហ្គោលហ្គលត្រេនស្លេត ទៅគេអាចយល់បាន»។

លោក គង់ សំនៀង បានលើកទឹកចិត្តបណ្តាជន ពិសេសលោកគ្រូ អ្នកគ្រូ គណៈនាយកមន្ត្រីរាជការផ្សេងៗ សូមយកចិត្តទុកដាក់ ហើយប្រែក្លាយការសរសេរឃែបសិននៅក្នុងបណ្ដាញសង្គមជាភាសាអង់គ្លេសទៅជាភាសាជាតិរបស់យើងវិញ។

លោកបានបង្ហាញនូវការគាំទ្រចំពោះការចេញសេចក្ដីណែនាំរបស់ក្រសួងថ្មីៗ នេះថា វាជារឿងល្អនៅក្នុងការសរសេរជាភាសាជាតិឱ្យបានត្រឹមត្រូវថែមទៀត ព្រោះថាភាសាជាតិ បើយើងមិនស្រលាញ់ តើឱ្យនរណាជាអ្នកស្រលាញ់។

គួរបញ្ជាក់ថា ថ្មីៗនេះ ក្រសួងអប់រំ យុវជន និងកីឡា បានចេញសេចក្ដីជូនដំណឹងធ្វើការណែនាំដល់គ្រប់អង្គភាពទាំងនៅថ្នាក់ជាតិ ថ្នាក់ក្រោមជាតិ គ្រឹះស្ថានសិក្សាសាធារណៈ និងឯកជនសិស្សានុសិស្ស យុវជន និងអ្នកពាក់ព័ន្ធ ប្រើប្រាស់សំណេរ និងអក្ខរាវិរុទ្ធភាសាខ្មែរឱ្យបានត្រឹមត្រូវ ក្នុងគោលបំណងលើកកម្ពស់ការប្រើប្រាស់សំណេរ និងអក្ខរាវិរុទ្ធភាសាខ្មែរ នៅលើបណ្ដាញផ្សព្វផ្សាយ បណ្ដាញទំនាក់ទំនងសង្គម និងនៅតាមទីសាធារណៈ ទាំងក្បួនសរសេរ អក្ខរាវិរុទ្ធ និងវេយ្យាករណ៍បណ្តុះស្មារតីស្រលាញ់ និងថែរក្សាអក្សរ និងភាសាជាតិ ឱ្យបានគង់វង្ស និងរីកចម្រើនថែមទៀត៕

អត្ថបទ ៖ សំអឿន