ព័ត៌មានជាតិ

បុណ្យទន្លេនៅខេត្តសៀមរាប រំពឹងទទួលបានទេសចរក្នុងរង្វង់ ១ លាននាក់មកកម្សាន្ត

បានផុស

១ year មុន

នៅ

ថ្ងៃព្រហស្បតិ៍ ២៩ កុម្ភៈ ២០២៤

ដោយ

លោក សូ ម៉ារ៉ា រដ្ឋលេខាធិការក្រសួងទេសចរណ៍ថ្លែងក្នុងសន្និសីទសារព័ត៌មាននៅរសៀលថ្ងៃទី២៨ ខែកុម្ភៈ ឆ្នាំ២០២៤ នេះដាក់ក្តីរំពឹងថា ពិធីបុណ្យទន្លេលើកទី ៨ ដែលនឹងឈានចូលមកដល់ក្នុងពេលឆាប់ៗខាងមុខនេះ អាចនឹងទទួលបានភ្ញៀវទេសចរក្នុងរង្វង់ ១ លាននាក់ នឹងមកលេងកម្សាន្តខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សូ ម៉ារ៉ា រដ្ឋលេខាធិការបានបញ្ជាក់ថា ភ្ញៀវទេសចរជាតិ-អន្តរជាតិ ដែលនឹងមកលេងកម្សាន្តក្នុងខេត្តសៀមរាបចំនួនក្នុងរង្វង់ ១លាននាក់ ជាហេតុធ្វើឲ្យផ្ទះសំណាក់ សណ្ឋាគារ ទាំងតូចធំ នៅក្នុងខេត្តអាចនឹងមានសភាពពេញណែន។

បុណ្យទន្លេឆ្នាំនេះនៅខេត្តសៀមរាប រៀបចំឡើងមានសកម្មភាពចម្រុះជាច្រើន ព្រមទាំងការសម្ដែងសិល្បៈពីសិល្បករ សិល្បការិនីជាតិ និងអន្តរជាតិ ការប្រគំតន្ត្រី ការតាំងពិព័រណ៍ផលិតផលទេសចរណ៍ និងផលិតផលទូទៅ មហោស្រពម្ហូបអាហារមេគង្គ ព្រមទាំងសកម្មភាពកម្សាន្តនានានៅតាមបណ្តោយដងស្ទឹងសៀមរាប និងតំបន់ Pub Street។ ជាពិសេស ក៏មានវត្តមានបវរកញ្ញាពិភពលោកជាង ១០០ នាក់មកពី ៧០ ប្រទេសមកចូលរួមទស្សនា និងផ្សព្វផ្សាយពីព្រឹត្តិការណ៍ដ៏ពិសេសនេះផងដែរ។

ទាក់ទងការចំណាយរៀបចំ រដ្ឋលេខាធិការក្រសួងទេសចរណ៍បានឲ្យដឹងថា គ្រោងចាយថវិការៀបចំប្រមាណជា ៤៥០លានរៀល ដែលចំនួននេះតិចជាងបុណ្យសមុទ្រ ៣ ដង ប៉ុន្តែក៏នឹងរៀបចំឲ្យបានល្អសម្រាប់ទទួលភ្ញៀវទេសចរជាតិនិងអន្តរជាតិមកកម្សាន្ត។

ពិធីបុណ្យទន្លេលើកទី ៨ រៀបចំឡើងក្រោមប្រធានបទ “ទន្លេដើម្បីសន្តិភាព និងការអភិវឌ្ឍ” ដែលនឹងប្រព្រឹត្តទៅរយៈពេល ២ ថ្ងៃពីថ្ងៃទី ១៦-១៧ ខែមីនា ឆ្នាំ២០២៤ នៅខេត្តសៀមរាប។

បន្ទាប់ពីអាក់ខានការរៀបចំដោយជំងឺឆ្លងរាលដាលសកលកូវីដ១៩ សម្រាប់ឆ្នាំ២០២៤ ការរៀបចំបុណ្យទន្លេនៅខេត្តសៀមរាប ក៏ស្របតាមយុទ្ធនាការ «ឆ្នាំទស្សនាខេត្តសៀមរាប ២០២៤» ដើម្បីជំរុញចលនាភ្ញៀវទេសចរមកកម្សាន្តខេត្តទេសចរណ៍ដ៏សំខាន់នេះ៕