លោក ជា ជាតិ ប្រាប់មន្ទីរអប់រំខេត្តស្វាយរៀង ពង្រឹង​អភិបាលកិច្ចសាលារៀន ដើម្បីលើកកម្ពស់គុណភាពអប់រំ

លោក ជា ជាតិ អនុរដ្ឋលេខាធិការក្រសួងអប់រំ យុវជន និងកីឡា បានណែនាំដល់មន្ទីរអប់រំខេត្តស្វាយរៀងឱ្យពង្រឹងអភិបាលកិច្ចសាលារៀន ដើម្បីលើកកម្ពស់គុណភាពអប់រំ។ លោកបានណែនាំបែបនេះ ក្នុងពិធីបិទសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡា ឆ្នាំសិក្សា២០២២-២០២៣ និងលើកទិសដៅការងារឆ្នាំសិក្សា២០២៣-២០២៤ នាសាលប្រជុំមន្ទីរអប់រំខេត្តស្វាយរៀង នៅព្រឹកថ្ងៃទី២៩ ខែកុម្ភៈ ឆ្នាំ២០២៤។

លោក ជា ជាតិ បានបញ្ជាក់ថា អនុវត្តតាមអនុសាសន៍ដ៏ខ្ពង់ខ្ពស់បំផុតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបានលើកឡើងអំពីការលើកកម្ពស់គុណភាពអប់រំ ដោយផ្តោតលើការពង្រឹងគុណភាពសាលារដ្ឋ ចាប់ពីថ្នាក់មត្តេយ្យសិក្សា ដល់មធ្យមសិក្សា តាមរយៈការពង្រឹងកិច្ចការសំខាន់ៗ ដូចជា ការពង្រឹងអភិបាលកិច្ចសាលារៀន ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យសមស្របទៅតាមតម្រូវការក្នុងការពង្រឹងចំពោះវិស័យសីលធម៌ និងឥរិយាបថរបស់សិស្ស។ មិនតែប៉ុណ្ណោះ លោកថា ត្រូវយកចិត្តទុកដាក់លើសុខភាពរបស់សិស្សតាមរយៈកម្មវិធីអាហារូបត្ថម្ភដល់កុមារ និងត្រួតពិនិត្យគុណភាពចំណីអាហារតាមសាលារៀន រួមទាំង ការជំរុញ និងលើកទឹកចិត្តឱ្យមានការចូលរួមរបស់មាតា បិតា អាណាព្យាបាល និងសហគមន៍ក្នុងការអប់រំស្របតាមពាក្យស្លោក ភាពជាដៃគូផ្នែករដ្ឋ និងសហគមន៍ ដើម្បីការអប់រំ។

បន្ថែមពីនេះ លោកក៏បានផ្តាំផ្ញើដល់មន្ត្រីពាក់ព័ន្ទឱ្យមានការយកចិត្តទុកដាក់ចំពោះបញ្ហាគន្លឹះសំខាន់ៗ និងបន្តអនុវត្តកំណែទម្រង់ស៊ីជម្រៅនានាដែលក្រសួងអប់រំ យុវជន និងកីឡា បាន និងកំពុងអនុវត្ត ជាពិសេស បន្តអនុវត្តគោលការណ៍អប់រំល្អ  គឺសាលារៀនផ្សារភ្ជាប់ជាមួយគ្រួសារ ជាមួយសង្គម ដោយផ្តល់ឱកាសស្មើៗគ្នាឱ្យកុមារដល់វ័យសិក្សាបានចូលរៀនគ្រប់គ្នា និងអប់រំពួកគេឱ្យរៀនសូត្ររហូតចប់កម្រិតមធ្យមសិក្សាទុតិយភូមិ ឬយ៉ាងហោចណាស់បានចប់ថ្នាក់ទី៩។

លើសពីនេះ មន្ទីរអប់រំ យុវជន និងកីឡាខេត្ត ត្រូវរៀបចំសាលារៀនដែលមានសក្តានុពល ដើម្បីឈានទៅទទួលបានជ័យលាភីសាលាគំរូនៅឆ្នាំ២០២៦។ ជាមួយគ្នានេះ ត្រូវខិតខំ និងរិះរកវិធានការដោះស្រាយ កាត់បន្ថយឱ្យនៅទាបបំផុតនូវអត្រាត្រួតថ្នាក់ និងអត្រាបោះបង់ការសិក្សា និងបន្តលើកកម្ពស់មនសិការវិជ្ជាជីវៈរបស់គ្រូបង្រៀន ពង្រឹងការងារគ្រប់គ្រង ជំរុញការងារត្រួតពិនិត្យតាមដាន និងអធិការកិច្ចឱ្យបានជាប្រចាំ ដើម្បីផ្លាស់ប្តូរឥរិយាបថគ្រូបង្រៀនសម្រាប់អ្នកជំនាន់ថ្មី៕

អត្ថបទ៖ ភក្តី